महायज्ञका नाममा दलितको उठीबास प्रकरण: गृह मन्त्रालय तानिए सिराहाका सीडीओ

काठमाडौँ, ८ चैत । सिराहाका प्रमुख जिल्ला अधिकारी बासुदेव दाहाललाई गृह मन्त्रालयमा तानिएका छन्। उनका स्थानमा कपिलबस्तुका प्रमुख जिल्ला अधिकारी विश्वप्रकाश अर्याललाई पठाइएको छ।

सिरहाको औरही गाउँपालिका–५ मा महायज्ञका नाममा दलित परिवारको घरमा डोजर चलाएर जबरन उठीबास गराउने घटनाप्रति संघीय संसदका सांसद, प्रदेशसभाका सांसद र विभिन्न संघसंस्थाले आपत्ति जनाएका छन्। उनीहरूले संसदीय छानबिन समिति गठन गरी दोषीमाथि कारबाहीको मागसमेत गरेका छन्।

यसै बीच, पीडित परिवार माथि दबाब सिर्जना गर्ने उद्देश्यले आयोजक, गाउँपालिकाका अध्यक्ष र पूर्ववडाध्यक्षले बिहीबार पीडित दीपक मलिक डोमको झुपडीमा पुगेर धम्की दिँदै जबरजस्ती कागजातमा हस्ताक्षर गराएका छन्। कागजातमा दीपकले आफ्नो घर राजीखुसीले भत्काउन दिएको भनेर उल्लेख गरिएको छ।

तिनै आयोजक बजरंगी बाबा, गाउँपालिका अध्यक्ष शिवजी यादव र पूर्ववडाध्यक्ष दिलीप यादवले थप केही नबोल्न र बोले ठीक नहुने भन्दै धम्की दिएपछि पीडित परिवार त्रासमा छन्। समाचार सार्वजनिक भएपछि ती व्यक्ति फरार भएका छन्।