एसइई परीक्षा आजदेखि सुरु, पाँच लाखभन्दा बढी विद्यार्थी सहभागी हुने

काठमाडौं। आजदेखि माध्यमिक शिक्षा परीक्षा (एसइई) सुरू भएको छ। राष्ट्रिय परीक्षा बोर्ड, परीक्षा नियन्त्रण कार्यालयका अनुसार, परीक्षा देशभरका दुई हजार ७९ परीक्षा केन्द्रबाट बिहान ८ बजेदेखि सञ्चालन हुँदैछ।

परीक्षाको तालिका अनुसार पहिलो दिन अनिवार्य अंग्रेजी, संस्कृत वेदविद्याश्रमतर्फ अनिवार्य संस्कृत रचना र मदरसातर्फ अनिवार्य अरेबिक भाषा विषयको परीक्षा हुनेछ। यस वर्षको एसइईमा पाँच लाख १४ हजार ७१ जना विद्यार्थी सहभागी हुने जानकारी बोर्डले दिएको छ। यो संख्या गत वर्षको एसइई परीक्षामा सहभागी भएका चार लाख ६४ हजार ७८५ जनाभन्दा ४९ हजार २८६ जना बढी हो।

परीक्षामा १५० जनासम्म परीक्षार्थी भएको केन्द्रमा एकजना सहायक केन्द्राध्यक्ष र २० जना विद्यार्थीको लागि एकजना निरीक्षक खटाइने व्यवस्था गरिएको छ। ७५ जनाभन्दा कम परीक्षार्थी भएको केन्द्रमा सहायक केन्द्राध्यक्ष नराखिने कार्यालयले जनाएको छ।

यस वर्षको एसइई परीक्षा आजदेखि सुरु भएर चैत १९ गतेसम्म सञ्चालन हुनेछ। परीक्षा बिहान ८ बजेदेखि ११ बजेसम्म हुनेछ।