पोखरा–छेन्दु उडान भोलिदेखि सुरु

काठमाडौँ , ४ चैत । नेपाल र चीनबीचको कूटनीतिक सम्बन्धको ७० वर्ष पूरा भएको अवसरमा, चीनको छेन्दुबाट पोखरा अन्तर्राष्ट्रिय विमानस्थलमा नियमित व्यावसायिक चार्टर उडान सुरु हुने भएको छ। सिचुआन एयरलाइन्सले सिचुआन प्रान्तको सहयोगमा मंगलबारदेखि पहिलो उडान सञ्चालन गर्ने जानकारी नेपाल पर्यटन बोर्डले दिएको छ।

यस उडानले नेपाल र चीनबीचको हवाई सम्पर्कलाई थप प्रभावकारी बनाउँदै पर्यटन, सांस्कृतिक आदान-प्रदान, र व्यावसायिक सहकार्यलाई नयाँ उचाइमा पुर्‍याउने विश्वास व्यक्त गरिएको छ। पोखरा–छेन्दु उडानले मध्य र पश्चिम नेपालका यात्रुहरूलाई सस्तो र सहज हवाई सेवा प्रदान गर्नेछ, र चिनियाँ पर्यटकलाई पोखराको सौन्दर्यको अवलोकन गर्न अवसर मिल्नेछ।

यो हवाई सम्पर्क नेपाल सरकारको ‘पोखरा पर्यटन वर्ष’ र चीन सरकारको ‘भिजिट नेपाल २०२५’ अभियानलाई प्रोत्साहित गर्नेछ। सिचुआन एयरलाइन्समार्फत पोखरा–छेन्दु उडानले दुवै देशका शहरहरू बीच मित्रता र सहकार्यलाई अझ बलियो बनाउने अपेक्षा गरिएको छ।

नेपाली प्रतिनिधिमण्डल छेन्दु, लुझाउ, र लेसान शहरमा व्यावसायिक बैठकहरूमा सहभागी हुनेछ। यस ऐतिहासिक पहलको सफलतामा सिचुआन एयरलाइन्स, सिचुआन प्रान्तीय सरकार, र पोखरा पर्यटन परिषद्लाई आभार व्यक्त गरिएको छ।