गण्डकी प्रदेशमा सरकार गठनमा राप्रपाको समर्थनमा निर्भर

गण्डकी २९ फागुन ।नयाँ शक्ति समीकरण अनुसार गण्डकी प्रदेशमा सरकार गठन राष्ट्रिय प्रजातन्त्र पार्टी (राप्रपा) को समर्थनमा निर्भर छ ।नयाँ गठबन्धनमा नेकपा (एमाले) बाट २२, नेकपा (माओवादी केन्द्र) बाट सात सदस्य (सभामुख बाहेक), र नेकपा (एकीकृत समाजवादी) बाट एक सदस्य गरी जम्मा ३० प्रदेशसभा सदस्य रहेका छन् ।

६० सदस्यीय प्रदेशसभामा सरकार बनाउन ३१ बहुमत सदस्यको समर्थन आवश्यक छ । गण्डकी प्रदेशसभामा सरकार गठनका लागि ३१ बहुमतीय सदस्यको समर्थन आवश्यक छ । गठबन्धनको बहुमतका लागि एक प्रदेशसभा सदस्य मात्रै अपुग भए पनि सरकार गठनमा राप्रपाका दुई प्रदेशसभा सदस्यको उपस्थिति महत्वपूर्ण छ । प्रदेशसभाको मतगणनाले नयाँ  सरकार गठनको पक्षमा नआएपछि गठबन्धनका दलहरूले समर्थनका लागि राप्रपासँग सम्पर्क गरेका छन् । एमाले र माओवादी केन्द्रका नेताहरुले राप्रपासँग वार्ता सुरु गरेका छन् ।

एमाले प्रदेशसभा संसदीय दलका प्रमुख सचेतक गोविन्दबहादुर नेपालीले राप्रपाले गठबन्धनलाई समर्थन गर्ने दाबी गरे । “राप्रपाले गण्डकी प्रदेश सरकार गठनमा सहयोग गर्नेमा हामी ढुक्क छौँ, जिम्मेवार दलका रूपमा राजनीतिक स्थिरताका लागि भूमिका खेल्नु उसको पनि दायित्व हो”, उनले भने, “विगतदेखि नै राप्रपासँग सहकार्य हुँदै आएको हो, अहिले पनि मिलेरै अगाडि बढ्ने वातावरण तयार हुँदैछ ।”

राप्रपाको केन्द्रीय कार्यसम्पादन समितिको बैठकले गरेको निर्णयले पनि गण्डकीमा गठबन्धनलाई सरकार गठन गर्न सहज हुने देखिएको प्रमुख सचेतक नेपालीले बताए।  सोमबारको बैठकबाट सङ्घ सरकारलाई समर्थन नगर्ने निर्णयमा पुगेको राप्रपाले प्रदेश सरकारलाई समर्थन गर्नुपर्ने परिस्थिति आएमा भने पार्टी अध्यक्षले सम्बन्धित प्रदेशसँग परामर्श गरेर उपुयक्त निर्णय लिनसक्ने निष्कर्ष निकालेको थियो ।

“राप्रपा वर्तमान सत्ता गठबन्धनमा सहभागी नहुने, विपक्षमा मतदान गर्ने र विपक्षमा बस्ने निर्णय गरिएको छ । प्रदेश सरकारमा पनि तत्काल सहभागी नहुने, समर्थन गर्नुपर्ने परिस्थिति आएमा पार्टी अध्यक्षले उपयुक्त समयमा सम्बन्धित प्रदेशको परामर्श लिएर निर्णय लिने निर्णय गरिएको छ”, राप्रपाद्वारा जारी विज्ञप्तिमा उल्लेख छ ।

नेपाल कम्युनिष्ट पार्टी (माओवादी केन्द्र) गण्डकी प्रदेशसभा संसदीय दलका प्रमुख सचेतक कुसुम बुढा पुनले पनि गण्डकीको सत्ता–राजनीतिमा देखिएको अन्योलता हटाउन राप्रपाले सकारात्मक भूमिका खेल्ने विश्वास व्यक्त गरे । संसदीय दलको बैठकले परिवर्तित सन्दर्भमा नयाँ सरकार निर्माण प्रक्रियामा सहज र स्वाभाविक राजनीतिक निकासका लागि सहयोग गर्न दलहरूलाई आह्वान गर्ने निर्णयसमेत गरेको उनले जानकारी दिए।

“माओवादी केन्द्रका तर्फबाट राप्रपालगायत अन्य राजनीतिक दल र पक्षसँग आवश्यक संवाद तथा समन्वयका लागि दलका नेता हरिबहादुर चुमानलाई जिम्मा दिइएको छ”, प्रमुख सचेतक पुनले भने । माओवादी केन्द्र प्रदेशसभा संसदीय दलका नेता चुमानले पनि नयाँ गठबन्धनकै सरकार बन्ने जिकिर गरे ।

“राप्रपासँग हामी संवादमै छौँ, गठबन्धनको केन्द्र तहबाट पनि सहकार्यका लागि पहल भइरहेको छ”, उनले भने, “नयाँ गठबन्धनकै सरकार बन्छ, नेतृत्व कुन दलले गर्ने भन्ने विषय भने टुङ्गिन बाँकी छ ।” २७ सिटको कांग्रेससँग राप्रपा मिल्दा पनि बहुमत नपुग्ने हुँदा राप्रपाले एमाले–माओवादी केन्द्रसहितको गठबन्धनलाई नै सघाउने नेता चुमानको विश्वास छ ।

गठबन्धनले प्रदेशको राजनीतिक शक्ति सन्तुलनका आधारमा नयाँ सरकार गठनको प्रक्रियालाई अगाडि बढाउने उनले बताए । अन्य दलको नेतृत्वमा पटक–पटक प्रदेश सरकारका सहभागी भएको भन्दै अब बन्ने सरकारको नेतृत्वमा माओवादी केन्द्रको सशक्त दाबी रहने नेता चुमानले बताए । चारपटकसम्म प्रदेश सरकारमा पुगेको माओवादी केन्द्रले अहिलेसम्म मुख्यमन्त्री पाउन सकेको छैन ।

मुख्यमन्त्री सुरेन्द्रराज पाण्डेले विश्वासको मत पाउने अवस्था नरहेकाले संवैधानिक प्रक्रियाअनुसार नयाँ सरकार बन्ने नेता चुमानको भनाइ छ । माओवादी केन्द्रले यही फागुन २३ गते समर्थन फिर्ता लिएसँगै कांग्रेस नेतृत्वको गण्डकी प्रदेश सरकार अल्पमतमा परेको छ । त्यसअघि फागुन २२ गते मुख्यमन्त्री पाण्डेले माओवादी केन्द्रका दुई मन्त्रीलाई बर्खास्त गरेका थिए ।

बहुमत नभएका मुख्यमन्त्री पाण्डेले ३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्था छ । राप्रपा प्रदेश सभा संसदीय दलका नेता पञ्चराम गुरुङले सफल राजनीतिक नतिजा सुनिश्चित गर्न राप्रपाले जिम्मेवारीपूर्वक परिस्थितिमा पुग्ने बताए । उनले पार्टी केन्द्रको सल्लाह र निर्देशनका आधारमा प्रदेश सरकारलाई सहयोग गर्ने निर्णय हुने बताए ।

राप्रपाका मुद्दा र मागलाई केन्द्र सरकारले कसरी प्रस्तुत गर्छ भन्नेमा निर्णयमा भर पर्ने उनको भनाइ छ । जिम्मेवार राजनीतिक दलका रूपमा उनीहरूले परिपक्व निर्णय गर्नेछन्। पार्टी केन्द्रबाट निर्देशनको पर्खाइमा रहेकाले के हुन्छ भन्ने अहिले नै अनिश्चित छ ।