अरु दललाई पनि सरकारमा सहभागी हुन एमालेको आग्रह

काठमाडौँ, २५ फागुन । केन्द्रीय कार्यालय च्यासलमा आज बिहान  बसेको नेकपा एमालेको सचिवालय बैठकले प्रधानमन्त्री पुष्पकमल दाहाल प्रचण्डको नेतृत्वको वर्तमान सरकारमा सहभागी हुन अरु दलहरुलाई पनि आग्रह गरेको छ ।

बैठकले राजनीतिक स्थायित्वका लागि प्रधानमन्त्रीसंग नयाँ सहकार्य गरेकोले यसलाई फलदायी बनाउनका लागि अरु दलहरुलाई पनि आग्रह गरेको हो । बैठकपछि सञ्चारकर्मीहरुसँग कुरा गर्दै पार्टीका महासचिव शंकर पोखरेलले नेकपा (माओवादी केन्द्र)का अध्यक्ष पुष्पकमल दाहाल नेतृत्वको ५ राजनीतिक दलहरु सम्मिलित सरकारमा अन्य राजनीतिक दलहरुलाई साथ र समर्थन गर्नका लागि अनुरोध गर्ने निर्णय गरिएको बताए । आजको बैठकमा परिवर्तित सत्ता समीकरण, पार्टीका नियमित गतिविधि र पूर्वनिर्धारित कार्यक्रमका विषयमा छलफल भएको पोखरेलले बताए ।

उनले भने आजको बैठकले जनतामा रहेको निराशालाई आशामा बदल्ने, मुलुकको राष्ट्रिय हित र स्वाभिमानलाई उचो बनाउने, विकास र समृद्धिका कामहरुलाई तिब्रता दिने सन्दर्भमा नयाँ सहकार्य फलदायी बनाउनुपर्ने कुरामा पनि जोड दिएको छ साथै मुलुकलाई सकारात्मक दिशामा अगाडि बढाउन, जनतामा आशा र विश्वास जगाउन, मुलुकको राजनीतिक स्थायित्व र विकासमा टेवा पुर्‍याउने हिसावले सरकारलाई पार्टीको तर्फबाट सकारात्मक योगदान पुर्‍याउन पार्टीको तर्फबाट सक्दो योगदान गर्ने छ ।

त्यस्तै बैठकमा पार्टी स्थापनाको ७५ औं बर्षगाठका सन्दर्भमा आगामी वैशाख १० गते आयोजना गर्न लागेको बिशेष समारोहको तयारीका बारेमा छलफल भएको उनले बताए ।