देश हुकुमी शासनमा होइन कानून अनुसार चल्नुपर्छ : सांसद खतिवडा

काठमाडौँ, जेठ २० । कांग्रेस सांसद रामहरी खतिवडाले उपप्रधान एवं गृहमन्त्री रवि लामिछानेले कानून विपरित हुकुमी शासन सुरु गरेको भन्दै सरकारको जवाफ माग गरेका छन् ।

आइतबार संघीय संसद भवन नयाँ बानेश्वरमा बसेको प्रतिनिधि सभा बैठकमा सांसद खतिवडाले गृहमन्त्री लामिछानेले ट्राफिक प्रहरी नियमावली विपरित आफूखुसी काम गरेको भन्दै विरोध गरेका हुन् । खतिवडाले गृहमन्त्री लामिछानेले मापसे गरेका व्यक्तिलाई सडक व्यवस्थापनमा पठाएको भन्दै आलोचना गरेका छन् ।

उनले भने, ‘एकजना उपप्रधानमन्त्रीले ट्राफिक महिला दिदीबहिनीहरुलाई पिरिएडको समय चार दिन बिदा दिने कामको सुरुवात गर्नुभएछ । कानून बनाएर गर्दा यो असाध्यै राम्रो काम हो । हामी स्वागत गर्न चाहान्छौं । तर, देश हुकुमी शासनमा होइन कानून अनुसार चल्नुपर्छ   ।’

यस्तै खतिवडाले ट्राफिक नियम मिच्नेलाई स्वयंसेवकको रूपमा एक घण्टा सडकमा खटाउने गृहमन्त्री लामिछानेको विवादास्पद निर्णयप्रति पनि असन्तुष्टि जनाएका छन् ।