सुप्रिम सहकारी ठगी प्रकरण: रवि लामिछानेको थुनछेक बहस आजदेखि

काठमाडौँ,१० माघ । राष्ट्रिय स्वतन्त्र पार्टीका सभापति रवि लामिछानेलाई सुप्रिम सहकारी ठगी प्रकरणमा रुपन्देही जिल्ला अदालतको थुनछेक बहस आजदेखि सुरू हुनेछ । जिल्ला न्यायाधीश प्रह्लाद कुमार योगीको इजलासले लामिछानेलाई उनकी श्रीमती निकिता पौडेल लामिछाने र कानुन व्यवसायीको जिम्मा लगाउँदै भोलि बिहान १० बजे अदालत उपस्थित गराउन आदेश दिएको थियो। लामिछाने बिहीबार अदालतमा उपस्थित भएर बयान दिएका थिए।

अदालतका श्रेस्तेदार दीपक मरासिनीका अनुसार, बयान प्रक्रिया सकिएसँगै अब आजबाट थुनछेक बहस सुरु हुनेछ। सुरूमा सरकारी वकिलहरूले बहस गर्नेछन्। त्यसपछि जाहेरवाला सहकारी पीडित पक्षका वकिलले बहस गरेपछि प्रतिवादी पक्षका वकिलहरूको पालो आउँछ। थुनछेक बहसमा १२ जनाभन्दा बढी सरकारी वकिलहरूले बहस गर्ने तयारी छ।पीडितको तर्फबाट वरिष्ठ अधिवक्ता दिनेश त्रिपाठी र सुरेन्द्र भण्डारीले बहस गर्ने छन्।

रवि लामिछानेविरुद्ध बुटवलको सुप्रिम सहकारीबाट बचतकर्ताको रकम ठगी गरेको आरोपमा पूरक अभियोग दर्ता गरिएको छ। बुटवलको सुप्रिम सहकारीको १ अर्ब ३१ करोडमध्ये ८६ करोड १८ लाख रुपैयाँभन्दा बढी रकम अपचलन भएको भन्दै यसअघि गत वैशाख ३ गते २८ जनालाई प्रतिवादी बनाएर अदालतमा मुद्दा दर्ता भएको थियो। लामिछाने पोखराको सूर्यदर्शन सहकारीमा जिल्ला अदालत कास्कीबाट ६५ लाख रुपैयाँ धरौटी बुझाएर रिहा भएका थिए । काठमाडौंमा पनि उनी ६० लाख रकम धरौटी बुझाएर रिहा भएका थिए ।