पोखरा भ्रमण वर्ष २०२५: चिनियाँ बजारमा प्रवर्द्धन अभियान

पोखरा । पोखराको पर्यटन प्रवर्द्धन गर्ने उद्देश्यले पोखरेली पर्यटन व्यवसायीहरूको टोली चीन भ्रमणमा जान लागेको छ। चिनियाँ पर्यटकलाई लक्षित गर्दै व्यवसायीहरूले चीनका विभिन्न सहरमा एक सातासम्म प्रवर्द्धनात्मक अभियान सञ्चालन गर्ने तयारी गरेका छन्।

पोखरा पर्यटन परिषद् (पिटिसी)का अध्यक्ष तारानाथ पहारीका अनुसार, चिनियाँ सहरहरूमा नेपालको पर्यटन प्रवर्द्धन गर्ने तथा पोखरामा चिनियाँ पर्यटकको संख्यामा वृद्धि ल्याउने लक्ष्यसहित व्यवसायीहरू अभियानमा सहभागी हुने भएका छन्।

यस अभियानका लागि चीनको सिचुआन एयरलाइन्सले पोखराबाट चीनको छेन्दुसम्म चार्टर उडानको व्यवस्था गरेको छ। चैत ५ गते सिचुआन एयरलाइन्सको जहाज छेन्दुबाट यात्रुहरू लिएर पोखरा आउनेछ भने सोही दिन फर्कने क्रममा पोखराबाट पर्यटन व्यवसायीहरूको टोलीलाई लिएर छेन्दु जानेछ।

नगर प्रमुख धनराज आचार्यको नेतृत्वमा रहेको टोलीले चीनको छेन्दु, लुझौं, चोङक्विङ लगायतका सहरमा पोखराको पर्यटन प्रवर्द्धनसम्बन्धी विभिन्न गतिविधि सञ्चालन गर्ने कार्यक्रम तय भएको छ। चीनबाट आएका पर्यटकहरू एक सातासम्म पोखरा, चितवन, र काठमाडौँमा भ्रमण गर्नेछन्।

यसैबीच, चिनियाँ पर्यटक आगमनलाई थप सहज बनाउन हिमालय एयरलाइन्सले आगामी चैत १८ गतेदेखि पोखराबाट चीनको ल्हासा सीधा उडान सुरु गर्ने योजना बनाएको छ। कम्पनीका अनुसार, सातामा एक पटक हुने उडान अन्तर्गत जहाजले बिहान काठमाडौँबाट ल्हासा प्रस्थान गर्नेछ। सोही दिन ल्हासाबाट पोखरा आउने तथा पोखरामा एक रात बसी भोलिपल्ट पुनः ल्हासा फर्किने तालिका रहेको छ। ल्हासाबाट सोही दिन काठमाडौँका लागि पनि उडान हुने बताइएको छ।

पर्यटन व्यवसायीहरूका अनुसार, चिनियाँ सहरहरूमा सञ्चालन गरिने प्रवर्द्धनात्मक अभियान तथा नयाँ हवाई उडान सेवाले पोखरामा चिनियाँ पर्यटक आगमनमा उल्लेखनीय वृद्धि गर्ने अपेक्षा गरिएको छ।