स्वीकृति बिना सञ्चालन भएको जनकपुरको मुस्कान अस्पताल बन्द

काठमाडौँ , २७ माघ । मधेश प्रदेशका मुख्यमन्त्री सतिशकुमार सिँहले जनकपुरधामका निजी अस्पतालहरूलाई आइतबारसम्म आफ्नै हातले ताल्चा लगाउन निर्देशन दिएका छन्। शनिबार अनुगमनका क्रममा उनले २० वटा अस्पतालमा स्वीकृति बिना सञ्चालन भइरहेका अस्पतालहरूलाई वैध अस्पतालमा बिरामी सारेर बन्द गर्न भने। स्वीकृतिप्राप्त अस्पतालहरूलाई मापदण्ड पूरा नगरी चलाउन नदिइने चेतावनी दिइएको छ।

मुख्यमन्त्रीले अनधिकृत अस्पताल संचालकहरूलाई कागजपत्र पेश गर्न र वैधता प्राप्त गर्न निर्देशन दिएका छन्। सरकारको टोली परिचालन गरेर अस्पताल बन्द गराइने चेतावनी पनि दिइएको छ। उनले अस्पतालमा जनशक्ति, उपकरण र भौतिक संरचना जस्ता मापदण्डहरूको जाँच पनि गरेका छन्। यस अनुगमन टोलीमा मुख्यसचिव मदन भुजेल, सचिव राजेशकुमार मिश्र र जनस्वास्थ्य अधिकृत सन्तोषकुमार ठाकुर पनि सहभागी थिए। यसअघि, मुस्कान अस्पताललाई बन्द गर्न निर्देशन दिइएको थियो।