तीनकुने घटनापछि महानगरको कारबाही,पूर्वराजा ज्ञानेन्द्र शाहद्धारा जरिवाना पत्र बुझ्न अस्वीकार,हुलाक मार्फत पठाइयो पत्र

काठमाडौं ।काठमाडौं महानगरपालिकाले पठाएको जरिवाना पत्र पूर्वराजा ज्ञानेन्द्र शाहले अस्वीकार गरेका छन्। महानगरपालिकाले गत शुक्रबार तीनकुनेमा आयोजित आन्दोलनका क्रममा भएको तोडफोड र फोहोर व्यवस्थापनको मूल्याङ्कन गर्दै ७ लाख ९३ हजार रुपैयाँ जरिवाना तोकेको थियो।

उक्त पत्र लिएर निर्मल निवास पुगेको महानगरपालिकाको टोलीलाई फर्काइएको नगर प्रहरी प्रमुख राजुनाथ पाण्डेले जानकारी दिए। उनका अनुसार शाहले पत्र ग्रहण गर्न अस्वीकार गरेपछि टोली बिना निष्कर्ष फिर्ता भएको छ। “पत्र बुझ्न मानेनन्, अब हामी कानुनी प्रक्रियामा जान्छौं,” पाण्डेले बताएका छन्।

यसपछि महानगरपालिकाले पत्र हुलाकमार्फत पठाएको छ। सम्बन्धित निकायलाई जानकारी गराउन तथा आवश्यक प्रक्रिया अघि बढाउन यो विधि अपनाइएको हो। हुलाक सेवामार्फत पठाइएका पत्रहरू प्रमाणिकरणका लागि सुरक्षित रहन्छन्। निर्धारित प्रक्रियाअनुसार पत्र प्राप्त भएपछि सम्बन्धित पक्षले आवश्यक निर्णय लिने अपेक्षा गरिएको छ।

महानगरपालिकाले अब कानुनी प्रक्रियाअनुसार अगाडि बढ्ने जनाएको छ।