गठ्ठाघर दुर्घटनाको सिसिटिभी फुटेज सार्वजनिक ,स्कुटरलाई ट्राफिकले रोकेको थिएन

काठमाडौं,३२ साउन। भक्तपुरको गठ्ठाघरमा बिहीबार दिउँसो भएको दुर्घटनाको सिसिटिभी फुटेज सार्वजनिक भएको छ ।  दुर्घटनास्थलको सीसीटीभी फुटेजमा दुर्घटनामा परेको स्कुटर र ट्रक दुवैलाई ट्राफिक प्रहरीले नरोकेको देखिएको हो ।

भक्तपुरको मध्यपुर थिमी नगरपालिका–३ गट्ठाघरमा बिहीबार ट्रकको ठक्करबाट स्कुटर चालकको घटनास्थलमै मृत्यु भयो । ना ६ ख २१७३ नम्बरको ट्रकले बा ४९ प ८९४४ नम्बरको स्कुटरलाई ठक्कर दिँदा एक जनाको घटनास्थलमै ज्यान गएको थियो । सिसिटिभी फुटेजमा ट्राफिक चेक पोष्ट कटेपछि ट्रकले स्कुटीलाई ठक्कर दिएको देखिएको छ ।

दिउँसो १: ४० बजे ना ६ ख २१७३ नम्बरको ट्रकले बा३९प ८९४४ नम्बरको स्कुटरलाई ठक्कर दिँदा स्कुटर चालक ओखलढुंगा स्थायी घर भएका उत्तम कोइरालाको मृत्यु भएको प्रहरीले जनाएको छ । ट्रकले स्कुटरलाई केही परसम्म घिसारेर लगेको र सामुन्ने रहेका ट्राफिक प्रहरीले यो दुर्घटना देखेपछि ट्रकतर्फ दौडिदै गएको दुश्य देख्न सकिन्छ ।

ट्रक चालक ट्रक रोकेर भागे का थिए । दुर्घटना भएपछि मानिसहरू सडकमा जम्मा हुन थाले। भिड बढ्दै गयो। प्रहरीले दुर्घटनामा परेका स्कुटर चालकलाई तत्काल उद्धार गर्न सक्ने स्थिति पनि रहेन। भिड प्रहरीहरूसँग जाइलाग्यो। स्थिति नियन्त्रण लिन प्रहरीलाई हम्मेहम्मे पर्ने अवस्थामा पुग्यो।दुर्घटनापछि फरार भएका ट्रक चालक सर्लाहीको मलंगवा नगरपालिका–२ का ३२ वर्षीय मलङ सतेन्द्र श्रेष्ठलाई बिहीबार साँझ नयाँ बानेश्वर वृत्त तीनकुनेले पक्राउ गरी थिमि वृत्तको जिम्मा लगाएको छ।दुर्घटनापछि बिहीबार दिनभर गठ्ठाघर तनावग्रस्त बनेको थियो ।