आत्मदाह प्रयास गरेका विवेक मण्डलको चार दिनपछि बर्न अस्पतालमा निधन

काठमाडौँ ।  सर्लाहीको गोडैता नगरपालिका–१० सिसौटियाका ४२ वर्षीय विवेक मण्डलको उपचारका क्रममा निधन भएको छ। उहाँले चार दिनअघि आफ्नै शरीरमा पेट्रोल छर्किएर आगो लगाउनुभएको थियो। गम्भीर अवस्थामा रहेका मण्डलको मङ्गलबार बिहान करिब २ बजे ललितपुरस्थित बर्न अस्पतालमा उपचारकै क्रममा मृत्यु भएको जिल्ला प्रहरी कार्यालय सर्लाहीका सूचना अधिकारी तथा प्रहरी नायब उपरीक्षक (डीएसपी) वेदप्रसाद गौतमले जानकारी दिनुभयो।

घटना गत शुक्रबार घर नजिकै भएको थियो। आगोले शरीरको धेरै भाग जलेपछि उहाँलाई तत्काल प्रादेशिक अस्पताल मलङ्गवामा पुर्‍याएर प्राथमिक उपचार गरिएको थियो। त्यहाँबाट थप उपचारका लागि नेपाली सेनाको हेलिकोप्टरमार्फत ललितपुरस्थित बर्न अस्पताल लगिएको थियो। चिकित्सकहरूले निरन्तर उपचार गरे पनि उहाँलाई बचाउन सकेनन्।

यस घटनापछि सर्लाही क्षेत्र नं. ४ का प्रतिनिधिसभा सदस्य डा. अमरेशकुमार सिंहले मण्डलको परिवारलाई आवश्यक सहयोग गर्ने प्रतिबद्धता जनाउनुभएको छ। विवेक मण्डलले यस्तो कदम किन चाल्नुभयो भन्ने कारण अहिलेसम्म खुलेको छैन। जिल्ला प्रहरी कार्यालय सर्लाहीले घटनाको सबै पक्षबाट अनुसन्धान गरिरहेको जनाएको छ। प्रहरीले परिवारका सदस्य र स्थानीयसँग पनि सोधपुछ गरिरहेको छ। घटनाको वास्तविक कारण अनुसन्धानपछि मात्रै स्पष्ट हुने अपेक्षा गरिएको छ।