कांग्रेसमा संकट गहिरिँदै, सभापति पदबाट थापा बाहिरिए

काठमाडौं। नेपाली कांग्रेसमा आन्तरिक विवाद चर्किरहेका बेला पार्टी सभापति थापाले पदबाट राजीनामा दिएका छन्। कांग्रेसले चैत ६ गते केन्द्रीय कार्यसमिति बैठक आह्वान गरेकै पूर्वसन्ध्यामा थापाले राजीनामा दिएका हुन्।

थापा गएको पुस २७ देखि ३० गतेसम्म काठमाडौंको भृकुटीमण्डपमा सम्पन्न विशेष महाधिवेशनबाट पार्टी सभापतिमा निर्वाचित भएका थिए। उक्त महाधिवेशनले थापाको नेतृत्वमा नयाँ केन्द्रीय कार्यसमिति समेत चयन गरेको थियो।

तर, सो महाधिवेशनको वैधानिकतामाथि प्रश्न उठाउँदै तत्कालीन सभापति शेरबहादुर देउवा र कार्यवाहक सभापति पूर्णबहादुर खड्का ले सर्वोच्च अदालतमा रिट दायर गरेका थिए। उक्त मुद्दा हाल पनि विचाराधीन अवस्थामा रहेको छ।

विशेष महाधिवेशनपछि कांग्रेस निर्वाचनमा सहभागी भएको थियो। प्रतिनिधि सभा निर्वाचनमा थापा सर्लाही क्षेत्र नम्बर ४ मा अमरेश सिंह सँग पराजित भएका थिए। सो निर्वाचनमा पार्टीका अन्य धेरै शीर्ष नेताले पनि अपेक्षित सफलता हासिल गर्न सकेनन्।

निर्वाचनपछि कांग्रेस कमजोर प्रतिपक्षका रूपमा देखिएको भन्दै देउवा पक्षका नेताहरूले थापाको नेतृत्वमाथि लगातार आलोचना गर्दै आएका थिए। पछिल्लो घटनाक्रमले पार्टीभित्रको आन्तरिक विवाद अझै गहिरिएको संकेत गरेको छ।