अधिवेशन नजिकिँदै, निर्माण व्यवसायीमा चुनावी सरगर्मी

काठमाडौँ। प्रतिनिधि सभा निर्वाचनका कारण स्थगित भएको नेपाल निर्माण व्यवसायी महासंघको साधारणसभा तथा नेतृत्व चयन प्रक्रिया अब चैतको दोस्रो साता हुने तयारी गरिएको छ। महासंघको २६ औँ साधारणसभामार्फत नयाँ नेतृत्व चयन गरिने भएपछि अध्यक्ष पदका आकांक्षीहरूले प्यानलसहित चुनावी तयारी तीव्र पारेका छन्।

महासंघको नेतृत्वका लागि सल्लाहकार निकोलस पाण्डे र वरिष्ठ उपाध्यक्ष आङदोर्जे लामाबीच प्रतिस्पर्धा हुने देखिएको छ। लामाले यसअघि नै आफ्नो प्यानल सार्वजनिक गरिसकेका छन्। उनको प्यानलमा वरिष्ठ उपाध्यक्षमा रोशन दाहाल, महासचिवमा शिवहरि घिमिरे र कोषाध्यक्षमा बालाजी श्रेष्ठ रहने प्रस्ताव गरिएको छ। यस्तै पाण्डे पक्षबाट वरिष्ठ उपाध्यक्षमा मुकेश पन्त, महासचिवमा धिरेन्द्र दाहाल र कोषाध्यक्षमा उज्वल गौतम उम्मेदवार बन्ने चर्चा छ।

महासंघले अधिवेशनको औपचारिक मिति भने अझै घोषणा गरेको छैन। सचिवालयका अनुसार चैत दोस्रो साताभित्र काठमाडौंस्थित प्रज्ञा प्रतिष्ठानमा अधिवेशन आयोजना गर्ने तयारी छ। महासंघका महासचिव रोशन दाहालले वर्तमान राजनीतिक अवस्था र निर्माण व्यवसायीमाथि बढ्दो चुनौतीका कारण महासंघ एकताबद्ध हुनुपर्ने बताए। सकेसम्म सहमतिमै नयाँ कार्यसमिति चयन गर्ने प्रयास गरिने, सहमति नभए प्रतिस्पर्धाबाट नेतृत्व चयन हुने उनले बताए।

यस पटकको साधारणसभामा देशभरबाट करिब एक हजार दुई सय मतदाता सहभागी हुने अपेक्षा गरिएको छ भने अधिवेशनमा दुई हजारभन्दा बढी व्यवसायीको उपस्थित रहने महासंघले जनाएको छ। अधिवेशनको अवसरमा निर्माण सामग्रीसम्बन्धी प्रदर्शनी र विभिन्न स्टलहरू पनि राखिने तयारी छ।

महासंघको विधानअनुसार प्रत्येक प्रदेश महासंघबाट अध्यक्षसहित १५ जना साधारणसभा प्रतिनिधि पठाउनुपर्ने व्यवस्था छ। जिल्ला संघ, एसोसिएट सदस्य तथा वस्तुगत संघबाट समेत प्रतिनिधित्व सुनिश्चित गरिनेछ। महिला सहभागिता बढाउन पाँच वा सोभन्दा बढी प्रतिनिधि पठाउने जिल्ला संघले कम्तीमा एक महिला प्रतिनिधि अनिवार्य पठाउनुपर्ने प्रावधान छ।

महासंघका वर्तमान अध्यक्ष रवि सिंहको दोस्रो कार्यकाल सकिएपछि नयाँ नेतृत्व चयन हुन लागेको हो। यसअघि माघमा हुने भनिएको अधिवेशन राजनीतिक परिस्थितिका कारण स्थगित गरिएको थियो।