राप्रपाद्वारा काठमाडौं महानगरलाई जरिवाना रकम भुक्तानी

काठमाडौं — राष्ट्रिय प्रजातन्त्र पार्टी (राप्रपा)ले काठमाडौं महानगरपालिकालाई एक लाख रुपैयाँ जरिवाना तिरेको छ।

आइतबार पूर्वराजा ज्ञानेन्द्र शाहको स्वागतमा राप्रपाले आयोजना गरेको प्रदर्शनका क्रममा फोहर भएको र भौतिक संरचनामा क्षति पुगेको भन्दै महानगरपालिकाले जरिवाना तिर्नुपर्ने निर्णय गरेको थियो। सोही अनुसार महानगरले राप्रपालाई एक लाख रुपैयाँ जरिवाना तिर्नुपर्ने पत्र पठाएको थियो।

राप्रपाका सचेतक ज्ञानेन्द्र शाही महानगरको कार्यालय पुगेर जरिवाना रकम बुझाएको बताएका छन्। उनका अनुसार महानगरको पत्रअनुसार तोकिएको जरिवाना आफैं उपस्थित भएर बुझाइएको हो।

यसअघि नेकपा (एमाले)ले दरबारमार्गमा आयोजना गरेको कार्यक्रममा फोहोर भएको भन्दै महानगरपालिकाले सोही प्रकृतिको पत्र पठाएको थियो।