तीनकुनेमा हिंसात्मक प्रदर्शनमा भाग लिएका १११ जना पक्राउ

काठमाडौँ, चैत १७ । काठमाडौंको तीनकुनेमा शुक्रबार पूर्वराजाको समर्थनमा भएको हिंसात्मक प्रदर्शनमा भाग लिएका १११ जनालाई प्रहरीले पक्राउ गरेको छ। प्रदर्शनको क्रममा आक्रमण, तोडफोड, आगजनी र लुटपाट जस्ता घटना भएका थिए। प्रहरीले २५ जनालाई प्रहरी परिसर काठमाडौँ, २५ जनालाई प्रहरी वृत्त बानेश्वर, ९ जनालाई गौशाला, ४६ जनालाई कोटेश्वर, ३ जनालाई गोङ्गबु, १ जनालाई बालाजु र २ जनालाई सिंहदरबारबाट पक्राउ गरेको हो। प्रहरीका अनुसार व्यक्तिगत र सरकारी कार्यालय गरी १८ वटामा तोडफोड भएको छ ।

विभिन्न १२ ठाउँमा आगजनी तथा एक ठाउँमा तोडफोड तथा लुटपाट भएको छ । यस प्रदर्शनमा दुई जनाको मृत्यु भएको र ५५ प्रहरी, २२ सशस्त्र प्रहरी र ५१ प्रदर्शनकारी घाइते भएका छन्। तीमध्ये २१ जनालाई विभिन्न अस्पतालमा उपचार भइरहेको छ। प्रदर्शनका क्रममा १८ सरकारी र व्यक्तिगत कार्यालयमा तोडफोड, १२ स्थानमा आगजनी, र एक स्थानमा लुटपाट भएको छ। केही गाडी र मोटरसाइकल पनि जलाइएको छ।