काठमाडौँ — अमेरिकी दूतावास, नेपालले देशभरका डिजिटल सामग्री निर्माता लक्षित गर्दै ‘यूएस एम्बेसी नेपाल क्रिएटर्स मेला २०२६’ आयोजना गर्ने भएको छ। चितवन, नेपालगञ्ज र काठमाडौँमा सञ्चालन हुने यो कार्यक्रम सबै तहका कन्टेन्ट क्रिएटरका लागि निःशुल्क हुनेछ।
यो मेला सामग्री सिर्जनाको प्रारम्भिक चरणमा रहेका व्यक्तिदेखि प्रभावशाली क्रिएटरसम्मका लागि तयार गरिएको हो। कार्यक्रममा अग्रणी कन्टेन्ट क्रिएटर, उद्योग विज्ञ तथा ब्रान्ड प्रतिनिधिहरूको सहभागिता रहनेछ, जहाँ सिर्जनशीलता, प्रभाव, दीर्घकालीन वृद्धि र वास्तविक क्रिएटर यात्राका विषयमा खुला र व्यवहारिक छलफल गरिनेछ।
प्यानल छलफलमार्फत सहभागीहरूले चुनौती, सिकाइ र दीर्घकालीन सफलताका वास्तविक अनुभव सुन्ने अवसर पाउनेछन्। साथै, गहिरो अध्ययन सत्र र प्रयोगात्मक कार्यशालामार्फत ग्रोथ रणनीति, ब्रान्डिङ, स्टोरीटेलिङ, नैतिकता, दिगोपन र प्रविधि प्रयोगसम्बन्धी ज्ञान प्रदान गरिनेछ, जुन सहभागीहरूले तत्कालै आफ्ना काममा प्रयोग गर्न सक्नेछन्।
कार्यक्रममा सिकाइसँगै सांगीतिक तथा सांस्कृतिक प्रस्तुति समेत रहनेछ, जसले नेपाली सिर्जनशीलतालाई उत्सवका रूपमा प्रस्तुत गर्नेछ। मेला चितवनमा जनवरी १७ मा होटल सिराइचुली, नेपालगञ्जमा जनवरी २४ मा होटल सिद्धार्थ र काठमाडौँमा जनवरी ३० र ३१ मा अलोफ्ट होटलमा आयोजना हुनेछ।
कार्यक्रममा प्रवेश निःशुल्क भए पनि अनिवार्य दर्ता आवश्यक रहेको अमेरिकी दूतावासले जनाएको छ। दर्ता तथा थप जानकारीका लागि कमेन्टमा दिइएको लिंकमार्फत जानकारी लिन सकिनेछ।
‘क्रिएटर्स मेला २०२६’ मार्फत नेपाली कन्टेन्ट क्रिएटरहरूले संयुक्त राज्य अमेरिकाका प्रविधि, विश्वव्यापी प्लेटफर्म र एआई-सक्षम उपकरण प्रयोग गरी आफ्ना विचारलाई व्यवसायमा रूपान्तरण गर्दै विश्वव्यापी दर्शकसम्म पुग्ने प्रयासलाई उजागर गरिनेछ। यस पहलले नेपालको डिजिटल अर्थतन्त्रको विकासमा योगदान पुर्याउँदै सिर्जनात्मक कामको भविष्यमा अमेरिकी नेतृत्वलाई समेत प्रस्तुत गर्ने उद्देश्य राखेको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
