मुलुक बाहिर जाने प्रत्येक नेपाली कामदार या पर्यटक यात्रुबाट १५ सय उठाइने

सरकारले विमानस्थलको दस्तुर नियमावली क्याबिनेट बैठकबाट पास गरेको छ ।

हालसम्म अन्तर्राष्ट्रिय विमानस्थलबाट मुलुक बाहिर जाने प्रत्येक यात्रुबाट एक हजार रुपैयाँ लिने व्यवस्था छ ।

केही समय अघिसम्म विमानस्थलमै त्यस्तो कर तिर्नुपर्ने व्यवस्था थियो भने पछि टिकटमार्फत् उक्त रकम उठाउन थालियो ।

त्यही एक हजारलाई अब भने १५ सय रुपैयाँ बनाइएको छ । यसो गर्दा बार्षिक सरकारलाई १५ अर्ब नाफा हुन्छ । हालसम्म काठमाडौंमा मात्र अन्तर्राष्ट्रिय विमानस्थल छ । पहिले एउटा विमानस्थललाई लक्षित गर्दै त्यहिबमोजिम दस्तुर नियमावली बनाइएको थियो । अब छिट्टै भैरहवा र पोखरा विमानस्थलबाट पनि अन्तर्राष्ट्रिय उडानको तयारी गरिएकाले उक्त नियमावलीको विद्यमान व्यवस्थामा संशोधन गरिएको प्रधानमन्त्री तथा मन्त्रिपरिषद् कार्यालय स्रोतले बताएको छ ।

यसैबीच पोखराको क्षेत्रीय विमानस्थल आगामी शुक्रबार नेपाल भ्रमणमा आउने चिनियाँ विदेशमन्त्री वाङ यी र नेपालका पर्यटन मन्त्री प्रेमबहादुर आलेले संयुक्त रुपमा सफ्ट ओपनिङ्ग गर्ने तयारी छ । उता भैरहवाको गौतम बुद्ध अन्तर्राष्ट्रिय विमानस्थल आगामी बुद्ध पूर्णिमाको दिनदेखि औपचारिक रुपमा सञ्चालनमा ल्याउने गरी काम अघि बढाइएको पर्यटन मन्त्रालयको उच्च स्रोतले बताएको छ ।