चोरीको अभियोगमा तीन युवा पक्राउ

काठमाडौँ , साउन २७ । प्रहरीले भरुवा बन्दुक र चोरीको समानसहित तीन युवालाई पक्राउ गरेको छ । पक्राउ पर्नेहरूमा झापाको अर्जुनधारा नगरपालिका – ४ का १९ वर्षीय आदित्य लिम्बु, सोही ठाउँका २२ वर्षीय छिरिङ तामाङ र सोही ठाउँका २१ वर्षीय निखिल तामाङ रहेका छन् ।

गत साउन २५ गते राति अर्जुनधारा–७ मिलडाँडाकी इन्दिरा अधिकारीको किराना पसलमा ताला फुटाएर नगद र सामान चोरी भएको  उजुरीका आधारमा प्रहरीले उनीहरुलाई पक्राउ गरेको हो ।

प्रहरीले उनीहरुको साथबाट चोरी गर्दा प्रयोग भएको एउटा खुकुरी , भरुवा बन्दुकसमेत बरामद गरेको छ । पक्राउ परेका उनीहरुलाई इलाका प्रहरी कार्यालय बिर्तामोडमा राखेर थप अनुसन्धान भइरहेको छ ।