प्रतिनिधिसभाको बैठक बस्दै, यस्तो छ कार्यसूची

काठमाडौँ, २६ जेठ — संघीय संसद्को प्रतिनिधिसभा बैठक आज सोमबार दिउँसो २ बजे नयाँ बानेश्वरस्थित संसद भवनमा बस्ने भएको छ। आइतबार दुई पटक स्थगन भएपछि साँझ एकछिन बैठक बसेको थियो, तर सहमति नजुटेकाले बैठक सोमबारसम्मका लागि स्थगित गरिएको थियो।

भिजिट भिसा प्रकरणमा छानबिन समिति गठन गर्नुपर्ने विपक्षी दलहरूको अडान र समितिको आवश्यकता नरहेको सत्तारुढ दलहरूको अडानबीच सहमति नजुट्दा आइतबारको बैठक सुचारु हुन सकेन। आज दलहरूबीच दिउँसो २ बजेभन्दा अगाडि सहमति जुटाउने प्रयास भइरहेको छ, जसबाट बैठक सञ्चालनको वातावरण बन्ने अपेक्षा गरिएको छ।

आजको बैठकको सम्भावित कार्यसूचीमा उपप्रधानमन्त्री तथा अर्थमन्त्री विष्णुप्रसाद पौडेलले आर्थिक वर्ष २०८२/८३ को राजस्व तथा व्ययको वार्षिक अनुमानमाथि सामान्य छलफल गरियोस् भन्ने प्रस्ताव प्रस्तुत गर्ने छन्। उक्त प्रस्तावमाथि बैठकमा छलफल हुने कार्यक्रम तय गरिएको छ।

यसैगरी, राज्य व्यवस्था तथा सुशासन समितिका सभापति रामहरि खतिवडाले ‘संघीय निजामती सेवा विधेयकसम्बन्धी समितिको प्रतिवेदन, २०८२’ बैठकमा पेस गर्ने कार्यसूचीमा रहेको छ। राजनीतिक सहमति नजुटे बैठक पुनः प्रभावित हुने जोखिम कायमै छ।