कान्ति अस्पतालले बच्चालाई गलत खोप लगाएको मुद्दामा ३० लाख क्षतिपूर्ति दिन सर्वोच्चको आदेश (पुर्णपाठ)

काठमाडौँ, १२ साउन । सर्वोच्च अदालतले ७ बर्षपछि कान्ति बाल अस्पतालका नाममा ३० लाख क्षतिपूर्ति दिन आदेश जारी गरेको छ ।

स्थायी घर रसुवा भएका हाल भक्तपुर सुर्यविनायक बस्ने ८ महिनाका बालक आलोक बराललाई गलत खोप लगाएको मुद्दामा पीडितलाई ३० लाख क्षतिपूर्ति दिन सर्वोच्चले अस्पतालका नाममा आदेश जारी गरेको हो ।
न्यायाधीश हरिप्रसाद फुयाल र तिलप्रसाद श्रेष्ठको संयुक्त इजलासले उक्त आदेश गरेको हो।

श्वासप्रश्वासमा समस्या भएर २०७३ साल असार २२ गते कान्ति बाल अस्पतालको इमर्जेन्सीमा उपचार गर्न पु¥याइएका बालक आलोक बराललाई गलत खोप दिँदा क्षति पुगेको भन्दै बाबु ध्रुबकुमार विश्वकर्माले रिट दर्ता गराएका थिए ।

शम्भु विक नामका अर्कै बालकका लागि तयार पारिएको उक्त खोप आलोकलाई लगाइएको थियो । त्यसपछि बच्चामा सास फेर्न गाह्रो हुनु, दिसा, पिसाब चुहिनु जस्ता लक्षणहरु देखिएपछि आलोकलाई गलत (मेनेन्जाइटिस मलेरियाको खोप) लगाएको पुष्टि भएको थियो ।

‘पिडित आलोक बरालको बाबु पुनरावेदक ध्रुवकु्मार विश्वकर्माले कान्ति बाल अस्पताल महाराजगञ्ज, काठमाडौँबाट क्षतीपुर्तिस्वरुप एकमुष्ट रकम रु ३०,०००००।– (तिस लाख रुपैया) भराई पाउने ठहरेकोले उक्त रकम निज पुनरावेदक ध्रुबकुमार विश्वकर्मालाई भराई दिनु भनी यो फैसलाको प्रमाणितप्रति साथै राखी कान्ति बाल अस्पताल महाराजगञ्ज, काठमाडौँमा लेखी पठाउनु भनी जिल्ला क्षतिपुर्ति समिति, काठमाडौँमा लेखी पठाउनु, ‘फैसलामा भनिएको छ ।’