सुनिता डंगोल द फोरम अफ ग्लोवल योङ् लिडर्समा चयन

काठमाडौं — काठमाडौं महानगरपालिका उपमेयर सुनिता डङ्गोल वर्ल्ड इकोनोमिक फोरमद्वारा सार्वजनिक २०२५ का “Young Global Leaders” (युवा विश्व नेताहरू) को सूचीमा परेकी छन्। विभिन्न पृष्ठभूमिका प्रभावशाली युवाहरू समेटिने यो सूचीमा डङ्गोलको समावेश नेपाली युवा नेतृत्वका लागि गर्वको विषय बनेको छ।

फोरमले डङ्गोलको राजनीतिमा सक्रियता, सांस्कृतिक पहिचानको प्रवर्द्धन, महिला सशक्तिकरण, र अन्तर्राष्ट्रिय मञ्चमा नेपालको प्रतिनिधित्वलाई सूचीकरणको प्रमुख आधार मानेको छ।

२९ वर्षको उमेरमा उपमेयर निर्वाचित भएकी डङ्गोलले काठमाडौंमा ६८,६१२ मत प्राप्त गर्दै २३,८०६ मत ल्याएका प्रतिस्पर्धीलाई पराजित गरेकी थिइन्। नेकपा एमालेबाट उम्मेदवारी दिएकी उनले युवा पुस्ताको प्रतिनिधित्व गर्दै राजनीतिमा उदय गरेकी हुन्।

राजनीतिक भूमिकासँगै उनी सांस्कृतिक पहिचान र लिपि संरक्षणमा पनि क्रियाशील छिन्। ‘क्यालिजात्रा’ अभियानमार्फत रैथाने लिपिहरूको जगेर्ना गरिरहेकी डङ्गोलले ‘मिस नेवा’ उपाधि जित्दै संस्कृति जगेर्नामा योगदान दिएकी छन्।

साथै, उनले अक्सफोर्ड विश्वविद्यालय, World Tourism Cities Summit, र Women of the World Festival जस्ता अन्तर्राष्ट्रिय कार्यक्रममार्फत नेपाललाई विश्वसामु चिनाउने कार्य गर्दै आएकी छन्।