सागर डिष्टिलरीले आम सर्वसाधारणका लागि आईपीओ खुला

काठमाडौं । सागर डिष्टिलरी लिमिटेडले आजदेखि आम सर्वसाधारणका लागि आफ्नो प्रारम्भिक सार्वजनिक निष्कासन (IPO) खुला गरेको छ । कम्पनीले प्रति कित्ता १०० रुपैयाँ अंकित दरमा ११ लाख ९० हजार ६४० कित्ता शेयर बिक्रीका लागि ल्याएको छ, जसको कुल मूल्य ११ करोड ९० लाख ६४ हजार रुपैयाँ बराबर हुनेछ ।

यसमा ७२ हजार ६०० कित्ता सामूहिक लगानी कोषका लागि र ४३ हजार ५६० कित्ता कर्मचारीहरूका लागि छुट्याइएको छ । बाँकी कित्तामा आम लगानीकर्ताले न्यूनतम १० कित्ता र अधिकतम १० हजार कित्तासम्म आवेदन दिन सक्नेछन् ।

पहिलो चरणमा कम्पनीले वैदेशिक रोजगारीमा रहेका नेपालीहरूलाई लक्षित गरी आईपीओ जारी गरिसकेको थियो भने, अब दोस्रो चरणमा आम सर्वसाधारणलाई आवेदन दिन अवसर मिलेको हो । यसअघि भदौ २५ गतेदेखि आईपीओ निष्कासन गर्ने योजना भए पनि देशको विषम परिस्थितिका कारण स्थगित गरिएको थियो ।

आवेदन प्रक्रिया आस्बा (ASBA) सदस्य बैंक तथा वित्तीय संस्थाहरू र मेरो शेयर पोर्टलमार्फत भर्न सकिनेछ । आईपीओ छिटोमा भदौ २४ गते र ढिलोमा असोज ३ गतेसम्म बन्द हुने छ ।

यस आईपीओको बिक्री प्रबन्धक मुक्तिनाथ क्यापिटल लिमिटेड रहेको छ । कम्पनीले यस सार्वजनिक निष्कासनमार्फत लगानीकर्ताको व्यापक सहभागिता सुनिश्चित गर्ने र बजारमा आफ्नो उपस्थितिलाई थप सुदृढ बनाउने लक्ष्य लिएको छ ।