सार्क सांस्कृतिक केन्द्रमा उपनिर्देशक पदका लागि आवेदन आह्वान

काठमाडौं – नेपाल सरकार परराष्ट्र मन्त्रालयले काठमाडौँस्थित सार्क सचिवालयबाट प्राप्त कूटनीतिक सूचनाका आधारमा सार्कको क्षेत्रीय केन्द्रका रूपमा रहेको सार्क सांस्कृतिक केन्द्रमा रिक्त पदका लागि आवेदन आह्वान भएको जानकारी सार्वजनिक गरेको छ। परराष्ट्र मन्त्रालयअन्तर्गत क्षेत्रीय संगठन महाशाखाले संस्कृति, पर्यटन तथा नागरिक उड्ययन मन्त्रालयलाई औपचारिक पत्राचारमार्फत उक्त सूचना उपलब्ध गराएको हो।

प्राप्त विवरणअनुसार सार्क सांस्कृतिक केन्द्रमा अनुसन्धान उपनिर्देशक पद पूर्तिका लागि योग्य उम्मेदवारबाट आवेदन माग गरिएको छ। पदका लागि आवश्यक योग्यता, अनुभव तथा अन्य सर्तहरू सचिवालयबाट प्राप्त कागजातमा उल्लेख गरिएको जनाइएको छ।

परराष्ट्र मन्त्रालयले सो जानकारी सार्वजनिक रूपमा प्रकाशन तथा प्रशारण गर्न अनुरोध गरेको छ। साथै, इच्छुक उम्मेदवारहरूबाट प्राप्त आवेदन फारामहरू एकमुष्ट रूपमा संकलन गरी परराष्ट्र मन्त्रालयमा पठाइदिन आवश्यक व्यवस्था मिलाउन निर्देशन दिइएको छ।

सचिवालयबाट प्राप्त कूटनीतिक नोट तथा सम्बन्धित कागजातहरू पत्रसँगै संलग्न गरिएको छ। सार्क क्षेत्रभित्र सांस्कृतिक अनुसन्धान र सहकार्यमा महत्वपूर्ण भूमिका निर्वाह गर्ने केन्द्रमा नेपाली विज्ञले अवसर पाउने अपेक्षा गरिएको छ।