रास्वपा नेतृत्वको सरकारले सार्वजनिक पदमा रहेका सबैको सम्पत्ति छानबिन गर्नुपर्छ:गगन थापा

काठमाडौँ । गगन थापाले अब देशमा आगामी पाँच वर्ष कुनै दुर्घटना, द्वन्द्व वा अतिवाद फैलिन नहुने बताएका छन्। उनले हालैको निर्वाचनमा ठूलो सफलता पाउने रवि लामिछानेलाई पनि बधाई दिएका छन्।

पार्टी कार्यालय सानेपामा सुरु भएको केन्द्रीय कार्यसमितिको बैठकलाई सम्बोधन गर्दै सभापति थापाले २०७८ देखि २०८२ सम्मको नयाँ राजनीतिक अध्याय सुरु भएको बताए। उनका अनुसार, नयाँ सरकार अब नागरिक र नवजवानको भावना अनुसार सञ्चालन हुनुपर्छ।

सभापति थापाले भने, नेपाली कांग्रेसले फागुन २१ को निर्वाचनमा प्रतिपक्षको भूमिकामा बस्ने जनादेश पाएको छ। उनले निर्वाचनमा सक्रिय रहेका नेता, कार्यकर्ता र आम मतदातालाई धन्यवाद समेत दिएका छन्।

उनले सरकारसँगै प्रतिपक्षको भूमिका अझ अहम हुने बताए र नागरिकले सुशासनको अपेक्षा राख्ने भएकाले सरकारले यसमा सचेत हुनुपर्ने बताए। सभापति थापाले कांग्रेसले सुशासनको पक्षमा सधैं अघि रहने र पछाडि नहुने पनि स्पष्ट पारे।

थापाले अबको रास्वपा नेतृत्वको सरकारले सार्वजनिक पदमा रहेका सबैको सम्पत्ति छानबिन गरी अवैध देखिएमा जफत गर्नुपर्ने बताए। उनले भने, “रास्वपाले आफ्नो चुनावी करारनामामा समेत छानबिन समिति बनाउने उल्लेख गरेको छ, हामी पनि त्यसमा सघाउनेछौँ।”