राष्ट्र बैंकद्वारा पुनः ३५ अर्ब रुपैयाँ तरलता व्यवस्थापन, निक्षेप संकलन उपकरणमार्फत तानिने

काठमाडौँ,— बैंकिङ प्रणालीमा अत्यधिक तरलता देखिएपछि नेपाल राष्ट्र बैंकले आज (बुधबार) निक्षेप संकलन उपकरणमार्फत ३५ अर्ब रुपैयाँ बराबरको तरलता संकलन गर्ने भएको छ। केन्द्रीय बैंकले तरलता व्यवस्थापनका लागि २१ दिन अवधिका लागि यो रकम संकलन गर्न लागेको हो।

यसका लागि आज दिउँसो ३ बजे बोलकबोल प्रक्रिया सञ्चालन गरिने राष्ट्र बैंकले जनाएको छ। उक्त बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्थाहरूले मात्र सहभागिता जनाउन पाउनेछन्।

निक्षेप संकलन उपकरणमार्फत राष्ट्र बैंकमा रकम जम्मा गर्न इच्छुक बैंक तथा वित्तीय संस्थाहरूले न्यूनतम १० करोड रुपैयाँ र अधिकतम ५ अर्ब रुपैयाँसम्मको प्रस्ताव पेश गर्न सक्नेछन्। बोलकबोल प्रस्तावहरू ५ करोड रुपैयाँको गुणनफलमा प्रस्तुत गर्नुपर्नेछ, बाँकी रकम स्वीकार गरिने छैन।

रकम संकलन गरिएको म्याद सकिएपछि साँवा र ब्याज जेठ १४ गते भुक्तानी गरिनेछ।

राष्ट्र बैंकले चालु वैशाख महिनामा मात्रै यो छैटौं पटक तरलता संकलन गर्न लागेको हो। यसअघि वैशाख ३ गते ३० अर्ब, ७ गते ३५ अर्ब, १० गते ३५ अर्ब, १७ र २१ गते ५०–५० अर्ब रुपैयाँ संकलन गरिएको थियो।