आकस्मिक सेवाबाहेक सबै सेवा ठप्प गरेर आन्दोलमा आउन नेपाल चिकित्सकको आह्वान

काठमाडौँ ,१२ वैशाख ।  नेपाल चिकित्सक संघले शुक्रबार आकस्मिक र सघन उपचारबाहेक सबै स्वास्थ्य सेवा बन्द गर्ने घोषणा गरेको छ। संघले विज्ञप्ति जारी गर्दै सबै सरकारी अस्पताल, मेडिकल कलेज, क्लिनिक र स्वास्थ्य संस्था बन्द गरेर आन्दोलनमा सहभागिता जनाउन चिकित्सकहरूलाई आह्वान गरेको हो।

बिहीबार माइतिघर मण्डलामा आन्दोलनरत चिकित्सकहरूसँग स्वास्थ्य तथा जनसंख्या मन्त्री प्रदीप पौडेलबीचको वार्ता निष्कर्षविहीन भएपछि संघले सेवा बन्दको निर्णय लिएको हो।

संघका अध्यक्ष डा. अनिल बिक्रम कार्कीका अनुसार, सरकारी आठौँ तह बराबरको भत्ता माग गर्दै निजी मेडिकल कलेजका आवासीय चिकित्सकहरू ३० दिनदेखि आन्दोलनमा छन्, तर सरकारले कुनै सुनुवाइ नगरेकाले सेवा ठप्प पार्न बाध्य भएको हो।

संघले शुक्रबार उपत्यकामा स्वास्थ्य मन्त्रालय र बाहिरी जिल्लामा प्रशासन कार्यालय घेराउ गर्ने कार्यक्रमसमेत तय गरेको छ। संघले सरकारलाई तत्काल माग सम्बोधन गर्न आग्रह गरेको छ।