नारायणघाट–बुटवल सडक खण्ड थप १५ दिन राति बन्द हुने

काठमाडौँ , १६ वैशाख । पूर्व–पश्चिम राजमार्गअन्तर्गत नारायणघाट–बुटवल सडकको दाउन्ने खण्ड राति ११ देखि बिहान ५ बजेसम्म थप १५ दिन बन्द गरिने भएको छ। बाटो विस्तारको काम नसकिएको भन्दै आयोजना निर्देशनालयले वैशाख ३१ गतेसम्म बन्द गर्ने जनाएको हो।

सवारी साधनलाई वैकल्पिक मार्ग प्रयोग गर्न ट्राफिक प्रहरीले अनुरोध गरेको छ। बुटवलतर्फ जाने सवारी होङ्सी सिमेन्ट गेट र नारायणघाटतर्फ जाने सवारी चिसापानी बर्दघाट खण्डमा रोकिनेछ। मालवाहक सवारी चोरमारा–आरुणखोला र ज्यामिरे–हकुई खण्डमा रोकिने छन्।

घाम लाग्दा अत्यधिक धुलो र पानी परेपछि हिलोले गाडी चल्न नसक्ने अवस्था देखिएको छ। १४ किलोमिटर पार गर्न घण्टौँ लाग्ने यात्रुहरू बताउँछन्। वैकल्पिक रूपमा कालिगण्डकी करिडोर प्रयोग गर्न सकिने जिल्ला ट्राफिक प्रहरी प्रमुख जनक बन्जाराले जानकारी दिए।