महरा पक्राउपछि पुन र उनका छोरामाथि सुन तस्करी छानबिन

काठमाडौँ । विद्युतीय चुरोट (भेप) मार्फत सुन लुकाएर गरिएको तस्करी प्रकरणले राजनीतिक वृत्तसम्मै तरंग ल्याएको छ। नेकपा (माओवादी केन्द्र)का उपाध्यक्ष तथा पूर्वसभामुख कृष्णबहादुर महरा पक्राउ परेपछि यस घटनाले नयाँ मोड लिएको छ। अब नेपाल प्रहरीले माओवादी केन्द्रकै उपाध्यक्ष तथा पूर्वउपराष्ट्रपति नन्दबहादुर पुन र उनका छोराहरूलाई पनि अनुसन्धानको दायरामा ल्याएको पुष्टि गरेको छ।

नेपाल प्रहरीको केन्द्रीय अनुसन्धान ब्युरो (सीआइबी) ले पुन परिवारसँगै संलग्न अन्य व्यक्तिहरूमाथि समेत छानबिन सुरु गरेको जनाएको छ। प्रहरी स्रोतका अनुसार, यो प्रकरणलाई संगठित अपराध र आपराधिक लाभसँग जोडेर अनुसन्धान अघि बढाइएको हो।

अनुसन्धानकर्ताहरूका अनुसार पुनका जेठा छोरा जितेन्द्र पुनले करिब दुई वर्षअघि हुम्लाबासी भएको नक्कली कागजात तयार गरी गृह मन्त्रालयबाट सीमा वारपार गर्ने परिचयपत्र बनाएका थिए। सो परिचयपत्रमार्फत उनी हुम्ला हुँदै चीनको ताक्लाकोट पुगेका थिए र त्यहाँ चिनियाँ गिरोहसँग तमसुक गरेर करिब चार किलो सुन बुझेका थिए। तर, भुक्तानी रकम नदिएपछि घटनाको खुलासा भएको हो। जितेन्द्र हाल अमेरिकामा रहेको बताइएको छ।

यस्तै, कान्छा छोरा दीपेश पुन पनि यता–उता विवादास्पद प्रकरणमा संलग्न हुँदै आएका छन्। जाँचबुझ आयोगको प्रतिवेदनअनुसार, उनले २०७९ सालमा भेपमार्फत करिब नौ किलो सुन र २०८० सालमा हङकङबाट ल्याइएका ब्रेक सुमा लुकाइएका ६१ किलो सुन तस्करीमा संलग्नता देखाइएको छ। उनी हाल भारतमा रहेको प्रहरी अधिकारीहरूले बताएका छन्।

माओवादी नेतृवसम्मै सुन तस्करीको मुद्दा जोडिनु नेपालमा अवैध सुन कारोबार कति गहिरो जरा गाडेको छ भन्ने प्रमाणका रूपमा लिइएको छ। महरा पक्राउ परेका र पुन परिवार अनुसन्धानको दायरामा पुगेका घटनाले सुन तस्करी प्रकरण अझ गम्भीर र राजनीतिक रंग लिएको विश्लेषकहरूको निष्कर्ष छ।