आज इस्लाम धर्मावलम्बीहरुले ईद-उल-फित्र मनाउँदै, देशभर सार्वजनिक विदा

काठमाडौँ , १८  चैत ।  आज इस्लाम धर्मावलम्बीहरू रमजानको पवित्र महिना समाप्त भएपछि ईद उल फित्र मनाउँदै छन्। हिजरी पात्रो अनुसार रमजानको अन्त्यमा मनाइने यो पर्व विशेष प्रार्थना, भेटघाट, नयाँ लुगा, मिठाइ आदान-प्रदान गरेर उत्सवको रूपमा मनाइन्छ। पर्वको दौरान, सानालाई आशीर्वाद दिइन्छ र आफन्तलाई सेवई, खजुरजस्ता मिठा खानेकुरा दिने परम्परा रहेको छ। साथै, ईदको दिन दीनदुःखीलाई खुशीपूर्वक दान दिइन्छ।

ईद-उल-फित्र पर्व, चन्द्रमा देखिएपछि तय हुने अरबी पात्रोको नवौँ महिनाको अन्तिम दिन मनाइन्छ। रमजान महिनाभर सूर्योदयदेखि सूर्यास्तसम्म उपवासको व्रतपछि एक अर्कामा खुशीयाली बाँड्ने गरिन्छ।

धार्मिक परम्पराअनुसार, ईदमा विशेष नमाज पढिन्छ र मोल्वी (धर्मगुरु) ले कुरानको वाचन गरेर मानिसलाई सदविचार र सत्कर्ममा रहने प्रेरणा दिन्छन्। यो पर्वमा नयाँ लुगा लगाउने, सेवई र खजुर जस्ता मिठा परिकार बनाएर एक अर्कासँग बाँडिन्छ।

ईदका अवसरमा सरकारको निर्णय अनुसार आज सार्वजनिक बिदा दिइएको छ। गृह मन्त्रालयका प्रवक्ता रामचन्द्र तिवारीका अनुसार २०८० माघ २९ को नेपाल राजपत्रमा सार्वजनिक बिदाको सूचना प्रकाशित गरिएको हो।