सरकारको निर्णयविरूद्ध सर्वोच्च पुगे कुलमान घिसिङ

काठमाडौ। नेपाल विद्युत प्राधिकरणका पूर्व कार्यकारी निर्देशक कुलमान घिसिङले आफ्नो बर्खास्तगीको निर्णयविरुद्ध सर्वोच्च अदालतमा रिट दायर गरेका छन्। उनले आफूलाई गैरकानूनी रूपमा हटाइएको दाबी गर्दै पुनर्स्थापनाको माग गरेका छन्।

घिसिङले नेपाल सरकार, ऊर्जा मन्त्रालय, र प्राधिकरणका नवनियुक्त कार्यकारी निर्देशक हितेन्द्रदेव शाक्यलाई विपक्षी बनाउँदै रिट निवेदन दायर गरेका छन्। उनले भनेका छन् कि आफूले कुनै गल्ती नगरेको अवस्थामा सरकारले बदनियतपूर्वक स्पष्टीकरण सोधेर गलत तरिकाले उनलाई पदमुक्त गरेको छ।

सोमबार साँझ करिब ५ बजे घिसिङका प्रतिनिधिले सर्वोच्च अदालतमा रिट निवेदन दर्ताका लागि पेश गरेका थिए। सर्वोच्च अदालतका सहरजिस्ट्रार अच्युत कुइँकेलका अनुसार निवेदन सोमबार मात्रै पेश भएको हुँदा औपचारिक रूपमा भोलि दर्ता हुनेछ। उनले रिट निवेदन प्राप्त भएको पुष्टि गर्दै आवश्यक कानुनी प्रक्रिया अघि बढाइने बताए।

कुलमान घिसिङको कार्यकालमा नेपालमा लोडसेडिङ अन्त्य गरी विद्युत व्यवस्थापनलाई प्रभावकारी बनाउन महत्वपूर्ण काम गरिएका थिए। तर, सरकारले उनलाई पुनर्नियुक्ति नगरी पदमुक्त गरेको थियो, जसको कारण आलोचना भइरहेको छ। अब सर्वोच्च अदालत यस मुद्दामा के निर्णय लिन्छ भन्ने चासो सर्वसाधारणमा रहेको छ।