रवि लामिछानेको बन्दी प्रत्यक्षीकरणको  निवेदन न्यायाधीश फुँयालले नहेर्ने

काठमाडौँ, वैशाख ८ । सहकारी ठगी प्रकरणमा पुर्पक्षका लागि थुनामा रहेका रवि लामिछानेको तर्फबाट दायर बन्दी प्रत्यक्षीकरण  निवेदनमाथि आज सर्वोच्च अदालतमा सुनुवाइ नहुने भएको छ। न्यायाधीश हरिप्रसाद फुँयालले उक्त मुद्दा नहेर्ने निर्णय गरेपछि सुनुवाइ रोकिएको हो। लामिछानेले आफूलाई गैरकानुनी रूपमा थुनामा राखिएको दाबी गर्दै श्रीमती निकिता पौडेलमार्फत आइतबार सर्वोच्च अदालतमा निवेदन दर्ता गराएका थिए।

उक्त निवेदनको प्रारम्भिक सुनुवाइका लागि आज न्यायाधीश फुँयालको इजलासमा पेशी तोकिएको थियो। तर न्यायाधीशले आत्मनिर्णय गर्दै मुद्दा नहेर्ने बताएपछि प्रक्रिया अगाडि बढ्न सकेन।लामिछानेले आफूलाई थुनामा पठाउने उच्च अदालत बुटवलको आदेशविरुद्ध सर्वोच्चमा निवेदन दिएका थिए, जहाँबाट अदालतले सम्बन्धित कागजातहरू मागिसकेको छ। आदेश टुंगिन समय लाग्ने भएपछि उनले बन्दी प्रत्यक्षीकरणको बाटो रोजेका हुन्।