सरकारले कालोबजारी गर्ने व्यवसायीविरुद्ध कडा कारबाही गर्ने चेतावनी

काठमाडौं । उद्योग, वाणिज्य तथा आपूर्ति मन्त्री दामोदर भण्डारीले दैनिक उपभोग्य वस्तुको कृत्रिम अभाव सिर्जना गरी कालोबजारी गर्ने व्यवसायी तथा उद्यमीविरुद्ध कडा कानुनी कारबाही गरिने चेतावनी दिएका छन् ।

नेपाल आर्थिक पत्रकार समाजद्वारा आयोजित उपभोक्ता सुरक्षा सम्बन्धी अन्तरक्रिया कार्यक्रममा बोल्दै मन्त्री भण्डारीले संविधानले प्रदान गरेको उपभोक्ता अधिकार संरक्षण गर्न सरकार प्रतिबद्ध रहेको बताए । उनले व्यवसायीहरूले व्यापारिक स्वच्छता तथा अनुशासन कायम गरी गुणस्तरीय वस्तु उपभोक्तालाई उपलब्ध गराउनुपर्ने बताए ।

मन्त्री भण्डारीले सरकारले गरेको हस्तक्षेपकारी बजार अनुगमनले उपभोक्ता अधिकार संरक्षणमा महत्त्वपूर्ण भूमिका खेलेको बताए । उनले भने, “आपूर्ति, सञ्चय, सुरक्षा र सुलभ वितरण व्यवस्थापनमा सरकार पूर्ण रूपमा प्रतिबद्ध छ । जनताको आकाङ्क्षा पूरा गर्न बजार प्रणालीलाई संस्थागत गर्नुपर्छ ।”

कानुनी मान्यताविपरीत सञ्चालन गरी समस्या सिर्जना गरिरहेका व्यवसायीविरुद्ध कारबाही गर्न सरकारले प्रदेश र स्थानीय तहसँग समन्वय गरी अनुगमन तीव्र पार्दै आएको मन्त्री भण्डारीले जानकारी दिए ।

वाणिज्य, आपूर्ति तथा उपभोक्ता संरक्षण विभागका महानिर्देशक कुमार दाहालले बजार अनुगमनका साथै शिक्षा, स्वास्थ्य जस्ता सेवा प्रदायक संस्थाहरूमाथि पनि हस्तक्षेपकारी अनुगमन गरिएको बताए । उनले कैफियत पाइएका ठाउँमा जरिवाना गराइएको पनि जानकारी दिए ।

साल्ट ट्रेडिङ कर्पोरेसनका नायब महाप्रबन्धक कुमार राजभण्डारीले नुनको आपूर्ति व्यवस्थापनमा संस्था सक्रिय रहेको बताए । उनले खाद्य पदार्थ, ग्यास, तेल लगायत उपभोग्य वस्तु सुलभ मूल्यमा उपलब्ध गराउने प्रतिबद्धता दोहोर्याए ।

कार्यक्रममा अधिकारीहरूले बजार अनुशासन कायम गरी उपभोक्ता अधिकार संरक्षण गर्न अनुगमन तीव्र पार्न आह्वान गरे ।