अवैध कारोबार नियन्त्रण र कारबाहीबाट करोडौं राजस्व दाखिला,हुण्डी कारोबार नियन्त्रणबाट रु. १ करोड माथि

काठमाडौँ । आर्थिक वर्ष २०७१/०८२ को जेठ महिनामा नेपाल प्रहरीले विभिन्न कारबाही र नियन्त्रण कार्यहरूबाट कूल ७६ करोड ३० लाख ९८ हजार ५४१ रुपैयाँ बराबरको राजस्व दाखिला गरेको छ। प्रहरीले अवैध गतिविधि नियन्त्रण, ट्राफिक कारबाही, अदालती फैसला कार्यान्वयनलगायत विविध क्षेत्रहरूमा गरेको प्रयासबाट यो राजस्व सङ्कलन भएको हो।

प्रहरीको तथ्यांक अनुसार अदालती फैसला कार्यान्वयनबाट सर्वाधिक रु. २० करोड ६२ लाख ५९ हजार ३७२ (२७.०३%) राजस्व दाखिला भएको छ। त्यसैगरी, अवैध मालसामान बरामद सम्बन्धी कारबाहीबाट रु. २४ करोड ८५ लाख ५ हजार ५६५ (३२.५७%) राजस्व संकलन भएको छ।

यस्तै, ट्राफिक कारबाहीबाट रु. ९ करोड ४१ लाख ३० हजार ७०६ (१२.३४%), अवैध सुन तथा चाँदी बरामदबाट रु. १६ करोड ५४ लाख ९९ हजार ५८४ (२१.६९%), हुण्डी कारोबार नियन्त्रणबाट रु. १ करोड २५ लाख १५ हजार ९२० (१.६४%) तथा अवैध मुद्रा बरामदबाट रु. ८८ लाख ९४ हजार ७२२ (१.१७%) राजस्व सङ्कलन भएको छ।

त्यस्तै, अवैध पशुपंक्षी नियन्त्रणबाट रु. ८० लाख ९६ हजार ४९० (१.०६%), अवैध नदीजन्य पदार्थ उत्खननबाट रु. ५० लाख ८३ हजार ७२६ (०.८६%), अवैध काठ बरामदबाट रु. २७ लाख ४१ हजार ७२४ (०.३८%) तथा स्रोत नखुलेको रकम बरामदबाट रु. १ करोड १३ लाख ३० हजार ७३२ (१.४८%) राजस्व दाखिला गरिएको छ।