कांग्रेस एकता प्रयास असफल, अब चुनावमा केन्द्रित हुनुपर्छ : शेखर कोइराला

काठमाडौँ । नेपाली कांग्रेसका नेता डा. शेखर कोइरालाले पार्टीलाई एकतामा राख्ने प्रयास सफल हुन नसकेको स्वीकार गरेका छन्। उनले अब पार्टीभित्र दोषारोपणमा समय खर्च नगरी आउँदो निर्वाचनमा केन्द्रित हुनुपर्ने बताएका छन्।

कांग्रेस विभाजनको विषयमा कसलाई दोषी र कसलाई निर्दोष भन्ने बहसले राष्ट्रिय राजनीतिलाई झन् बिगार्ने भन्दै उनले त्यसको मूल्यांकन इतिहासले नै गर्ने उल्लेख गरेका छन्। पार्टी एकताका लागि आफूहरूले इमानदार प्रयास गरे पनि सफल हुन नसकेको र त्यसमा सबैले कहीँ न कहीँ कमजोरी गरेको स्वीकार गर्नुपर्ने उनको भनाइ छ।

डा. कोइरालाले कांग्रेस कमजोर बनाउन भित्र र बाहिरबाट अनेक गतिविधि भएको उल्लेख गरे। राजधानीमा राष्ट्रिय र अन्तर्राष्ट्रिय स्तरका चलखेल भएको भए पनि त्यसलाई रोक्न नसकिएको उनले बताए। सबैको चाहना कांग्रेस एक भएर चुनावमा जाने नै थियो, तर परिस्थितिले त्यस्तो हुन नसकेको उनले स्वीकार गरे।

यस कठिन अवस्थामा पार्टीका संस्थापक नेता बीपी कोइरालालाई सम्झनुपर्ने भन्दै उनले बीपीले पनि कठिन परिस्थितिमा पार्टीभित्र र बाहिर संघर्ष गरेको स्मरण गरे। कांग्रेस एक भएर अघि बढ्न नसक्नु नियतिको कठोर सत्य जस्तै भएको उनको धारणा छ।

अब पार्टीका सामु आउँदो निर्वाचन र कांग्रेसको लामो इतिहास जोगाउने जिम्मेवारी रहेको भन्दै उनले सबै कार्यकर्ता एक भएर चुनावी अभियानमा जुट्न आग्रह गरे। कांग्रेस आम कार्यकर्ताले बनाएको पार्टी भएकाले सबै घर फर्केर कांग्रेसभित्रै बसेर देशको भविष्य बनाउनुपर्ने उनको आह्वान छ। पार्टीभित्र आवश्यक सुधार प्रक्रिया भने रोकिने छैनन् भन्दै उनले सबैलाई एकताका लागि अघि बढ्न आग्रह गरेका छन्।