उपसभामुख इन्दिरा राना मगरलाई पदबाट हटाउने तयारीमा कांग्रेस र एमाले

काठमाडौं, भदौ ३ – सत्तारुढ दल नेपाली कांग्रेस र नेकपा एमालेले प्रतिनिधि सभाकी उपसभामुख इन्दिरा राना मगरलाई पदबाट हटाउने तयारी तीव्र बनाएका छन्। यसै क्रममा एमालेले मंगलबार सिंहदरबारमा आकस्मिक बैठक बोलाएर आफ्ना सांसदहरूको हस्ताक्षर संकलन थालेको छ। उता, कांग्रेसले पनि सभापति शेरबहादुर देउवाको निवास बुढानीलकण्ठमा शीर्ष नेताहरूको बैठक बोलाएको छ, जसपछि संसदीय दलको बैठक बस्नेछ।

राना मगर राष्ट्रिय स्वतन्त्र पार्टी (रास्वपा) बाट उपसभामुख बनेकी हुन्। कांग्रेस र एमालेले उनको व्यवहार र कामप्रति असन्तुष्टि जनाउँदै उनलाई हटाउने रणनीति बनाएका हुन्। तर, यी दुई पार्टीसँग मात्र दुई तिहाइ बहुमत नपुग्ने भएकाले साना दलहरूको साथ बिना उनलाई हटाउन सकिँदैन।

रास्वपाले उपसभामुख हटाउने प्रयास भए सशक्त प्रतिवाद गर्ने चेतावनी दिएको छ। उपसभामुख राना अहिले व्यक्तिगत भ्रमणमा अमेरिका गएकी छिन् र भदौ १३ गते फर्किने कार्यक्रम छ। रास्वपाले संवैधानिक परिषदमा आफू अनुकूल नियुक्ति गर्न दबाब दिन उनलाई हटाउन खोजिएको आरोप लगाएको छ।