महासचिवमा शंकर पोखरेल, सचिव पदमा ओली प्यानल विजयी,ईश्वर पोखरेल प्यानलका दुईजना मात्र पदाधिकारी विजयी

काठमाडौँ — नेकपा एमालेको ११औँ राष्ट्रिय महाधिवेशन अन्तर्गत बिहीबार सम्पन्न मतगणनाअनुसार अध्यक्षका प्रत्यासी ईश्वर पोखरेल प्यानलका दुईजना मात्र पदाधिकारी विजयी भएका छन्।

नेकपा एमालेको अध्यक्षमा केपी शर्मा ओली पुनः निर्वाचित भएका छन्। निर्वाचनको अन्तिम परिणामअनुसार ओलीले १६६३ मत प्राप्त गर्दै पार्टी अध्यक्षमा तेस्रो कार्यकालका लागि भारी मतको साथ विजयी भएका हुन्।

निर्वाचनमा जम्मा २२२७ मत खसेको थियो। निर्वाचन आयोगले मतगणना प्रक्रिया पूरा भइसकेपछि केही समयपछि आधिकारिक परिणाम सार्वजनिक गर्ने जनाएको छ। ओलीको तेस्रो कार्यकालले पार्टीको नेतृत्वलाई निरन्तरता दिने र आगामी राजनीतिक चुनौतीहरूमा स्थिरता ल्याउने विश्वास व्यक्त गरिएको छ।

पार्टीभित्र १९ पदाधिकारीको निर्वाचनमा, पोखरेल प्यानलबाट गोकर्ण विष्ट उपाध्यक्ष र योगेश भट्टराई उपमहासचिवमा विजयी भएका छन्। अन्य महत्वपूर्ण पदमा महासचिवमा ओली निकट सहयोगी शंकर पोखरेल विजयी भएका छन् भने सचिवतर्फ सबै नौजना विजयी उम्मेदवार ओली प्यानलका रहेका छन्।