मतदान प्रक्रियाप्रति आम मतदाताको उल्लेखनीय सहभागिता,६५ प्रतिशतभन्दा बढी मत खस्ने अनुमान

काठमाडौँ । कार्यवाहक प्रमुख निर्वाचन आयुक्त रामप्रसाद भण्डारीले देशभर शान्तिपूर्ण र उत्साहजनक वातावरणमा मतदान जारी रहेको बताएका छन्। मतदान पश्चात सञ्चारकर्मीसँग संक्षिप्त प्रतिक्रिया दिँदै उनले ७७ वटै जिल्लामा आम मतदाताको सक्रिय सहभागितासहित मतदान भइरहेको जानकारी दिए।

उनका अनुसार बिहान ७ बजेदेखि नै व्यवस्थित ढङ्गले मतदान प्रक्रिया सुरु भएको छ र सुरक्षा व्यवस्था सन्तोषजनक छ। मतपत्र प्राप्त गरेपछि एकदेखि दुई मिनेटभित्र मतदान सम्पन्न हुने व्यवस्था मिलाइएको उनले बताए।

आयुक्त भण्डारीले मतदाता, राजनीतिक दल र उम्मेदवारलाई शान्तिपूर्ण र मर्यादित मतदान प्रक्रियामा सहयोग गर्न आह्वान गरे। मतदान सम्पन्न भएलगत्तै मतपेटिका संकलन गरी मतगणना सुरु गरिने जानकारी दिँदै उनले मतगणना सुरु भएको २४ घन्टाभित्र प्रत्यक्षतर्फको नतिजा सार्वजनिक गर्ने लक्ष्य रहेको बताए।

युवाको उल्लेखनीय सहभागिताका आधारमा ६५ प्रतिशतभन्दा बढी मत खस्ने अनुमान गरिएको आयोगको भनाइ छ। आयोगका अनुसार बिहान १० बजेसम्म करिब ६ प्रतिशत मतदान भइसकेको छ।