त्रिशुली बस दुर्घटना अपडेटः मृतकको संख्या सात पुग्यो

काठमाडौँ, २३ फागुन ।  कपिलवस्तुबाट काठमाडौँ आउँदै गरेको रात्री बस बुधबार बिहान त्रिशूलीमा खसेको छ । बस दुर्घटनामा मृत्यु हुनेको सङ्ख्या सात पुगेको छ। बसमा  चालकसहित  ३० जना घाइते छन् । १० जना गम्भीर घाइतेलाई उपचारका लागि काठमाडौ ल्याइएको छ भने केही घाइतेहरूको चितवन र स्थानीय अस्पतालमा उपचार भइरहेको छ ।

मृतकको सनाखत हुन बाँकी छ। बसमा   ४२ जना यात्रु रहेको भन्ने विवरणका अनुसार अन्य यात्रुको  खोजी कार्य भइरहेको धादिङका प्रमुख जिल्ला अधिकारी बद्रीनाथ गैह्रेले जानकारी दिए ।

उनका अनुसार मृतकहरुको पहिचान खुलेको छ । चालक पनि घाइते छन् । बिहान करिब पौने पाँच बजे पृथ्वी राजमार्गस्थित धादिङको गजुरी गाउँपालिका-५ घाटबेशीमा गति अनियन्त्रित भई बस त्रिशूलीमा खसेको थियो । रूपन्देहीबाट काठमाडौं आउँदै गरेको सिद्धार्थ यातायातको लु २ ख २१२१ नम्बरको बस  आज बिहान त्रिशूली नदीमा खसेको थियो ।