कालीगण्डकी करिडोरमा राति सवारीसाधन चलाउन रोक

काठमाडौँ २९ भदौ | नवलपरासी  नवलपुरस्थित कालीगण्डकी करिडोरमा निर्माणका क्रममा रहेकाले रातिको समयमा सवारीसाधन सञ्चालनमा प्रहरीले रोक लगाएको छ ।नवलपुरमा कालीगण्डकी करिडोर करिब ८७ किलोमिटर लामो छ । यसमध्ये आधाजस्तो खण्डमा फोन सम्पर्कसमेत हुन नसक्ने भएकाले राति दुर्घटना भए उद्धारमा समेत समस्या हुने र यसले क्षति हुने  भएकाले  सवारीसाधन सञ्चालनमा रोक लगाइएको हो ।

जिल्ला प्रहरी कार्यालय नवलपरासी पूर्वका प्रहरी नायब उपरीक्षक बेदबहादुर पौडेलका अनुसार  करिडोर निर्माणका चरणमा छ पूरा भएको छैन । यसले दुर्घटनाको जोखिम बढाएको छ  राति उद्धारमा पनि कठिनाइ हुने गरेको छ  ।

निर्माणधीन कालीगण्डकी करिडोरको नवलपुर खण्डमा करिब ८० प्रतिशत काम सम्पन्न भइसकेको छ । नवलपुरस्थित कालीगण्डकी करिडोरबाट जिल्लाका पहाडी क्षेत्रका लागि साना सवारीसाधन सञ्चालन हुने गर्छन् ।