ऐन उल्लङ्घन गर्ने व्यवसायमाथि विभागको कारबाही

काठमाडौं । उद्योग, वाणिज्य तथा आपूर्ति मन्त्रालयअन्तर्गत वाणिज्य, आपूर्ति तथा उपभोक्ता संरक्षण विभागले उपभोक्ता संरक्षण ऐन, २०७५ र नियमावली, २०७६ कार्यान्वयनका क्रममा विभिन्न उद्योग तथा फर्ममाथि अनुगमन गरी कारबाही गरेको छ। विभागले सोमबार मिति २०८२/१०/१९ मा काठमाडौं र भक्तपुर क्षेत्रमा सञ्चालनमा रहेका व्यवसायहरूको अनुगमन निरीक्षण गरेको हो।

अनुगमनका क्रममा मध्यपुर थिमी नगरपालिका–७ भक्तपुरस्थित रमेश थापा स्टोरले उपभोक्ता संरक्षण ऐनको दफा १५ बमोजिम गर्नुपर्ने कार्य नगरेको पाइएको विभागले जनाएको छ। उक्त कसुरमा ऐनको दफा ३८ (घ) अनुसार दोषी ठहर गर्दै दफा ३९ (१)(क) बमोजिम १० हजार रुपैयाँ जरिवाना गरिएको छ।

यस्तै, काठमाडौं महानगरपालिका–७ मा सञ्चालनमा रहेको गणपती जी ट्रेडर्सलाई व्यवसायसँग सम्बन्धित सम्पूर्ण कागजातसहित २४ घण्टाभित्र विभागमा उपस्थित हुन निर्देशन दिइएको छ। अन्य फर्महरू नेपाल ग्याँस उद्योग प्रा.लि. (बालाजु–१६), ग्याँस एण्ड अक्सिजन ट्रेडर्स (काठमाडौं–७) र शुलभ खाद्य सप्लायर्स (काठमाडौं–११) लाई सामान्य निर्देशन दिइएको विभागले जनाएको छ।

विभागले उपभोक्ताको हकहित संरक्षणका लागि बजार अनुगमनलाई निरन्तरता दिने र ऐनविपरीत गतिविधि गर्ने व्यवसायमाथि कडाइका साथ कारबाही गरिने स्पष्ट पारेको छ।