वासिङ्टन जहाज दुर्घटना: ब्ल्याक बक्स भेटियो

एजेन्सी । अमेरिकाको वासिङ्टन डीसीमा हेलिकप्टरसँग ठोक्किएर दुर्घटना भएको अमेरिकन एयरलायन्सको विमानको ब्ल्याक बक्स भनिने फ्लाइट डाटा रेकर्डर र ककपिट भ्वाइस रेकर्डर फेला परेको छ।ब्ल्याक बक्समार्फत् दुर्घटना हुँदा के भएको थियो भन्ने पत्ता लगाउन सहज हुने अधिकारीहरूले बताएका छन्। ब्ल्याक बक्सलाई राष्ट्रिय यातायात सुरक्षा बोर्डको प्रयोगशालामा जाँच गरिने बीबीसीले जनाएको छ। चालक दलसमेत ६४ जना सवार विमान र ३ सैनिक चढेको हेलिकप्टर स्थानीय समयानुसार बुधबार राति ९ बजे वासिङ्टन डीसीस्थित रेगन राष्ट्रिय विमानस्थलनजिकै आकासमा ठोकिएर पोटोम्याक नदीमा खसेका थिए।

अमेरिकी सञ्चारमाध्यमहरूले पोटोम्याक नदीबाट ४० जनासहित अहिलेसम्म ५० जनाक शव फेला परेको जनाएका छन्।१७ जना अझै बेपत्ता छन्। उनीहरूको खोजी भइरहेको छ। अहिले उद्धारको काम चलिरहेको छ। दुर्घटनामा कोही पनि जीवित नरहेको निष्कर्षमा अधिकारीहरू पुगेका छन् । राष्ट्रपति ट्रम्पले भने जहाज दुर्घटना हुनुमा यसअघिको डेमोक्र्याटको सरकारका नीतिलाई दोष दिएका छन्।

उनले उड्डयन प्रणाली काम गर्नका लागि भर्ती हुन उच्चतम मापदण्ड हुनुपर्ने बताउँदै यसअघिको प्रशासनको नीतिका कारण दुर्घटना भएको बताए।