संयुक्त राज्य अमेरिका र इजरायलद्वारा इरानमाथि आक्रमण

काठमाण्डौ।मध्यपूर्व क्षेत्रमा तनाव तीव्र बन्दै जाँदा संयुक्त राज्य अमेरिका र इजरायलले संयुक्त रूपमा इरानका विभिन्न शहरहरूमा लक्षित सैन्य आक्रमण सुरु गरेका छन्। मिति २०८२ फागुन १६ गते शनिबार गरिएको आक्रमणपछि राजधानी तेहरानमा विस्फोटका कारण आकाशमा धुवाँका बाक्ला मुस्ला देखिएका छन्।

इरानी सुरक्षास्रोतका अनुसार आक्रमणपछि इरानले प्रत्युत्तरस्वरूप क्षेप्यास्त्र प्रहार गरेको छ। इजरायली सेनाले इरानबाट क्षेप्यास्त्र आक्रमण भएको पुष्टि गर्दै आफ्ना नागरिकलाई सुरक्षित स्थानमा जान निर्देशन दिएको छ। त्यसैगरी खाडी क्षेत्रका अमेरिकी कूटनीतिक नियोगहरूलाई पनि सतर्क रहन आदेश दिइएको जनाइएको छ।

आक्रमणको पृष्ठभूमिमा अमेरिकी राष्ट्रपति डोनाल्ड ट्रम्पले इरानसँग जारी आणविक तथा क्षेप्यास्त्रसम्बन्धी वार्ताप्रति असन्तुष्टि व्यक्त गरेका थिए। शनिबार राष्ट्रका नाममा सम्बोधन गर्दै ट्रम्पले इरानविरुद्ध “विशाल” सैन्य अभियान सुरु भएको घोषणा गर्नुभयो। उहाँका अनुसार अमेरिकी जनताको सुरक्षा सुनिश्चित गर्नु र इरानी शासनबाट उत्पन्न तत्कालीन खतरालाई समाप्त गर्नु नै अभियानको मुख्य उद्देश्य हो।

यस घटनापछि अन्तर्राष्ट्रिय समुदायमा चिन्ता बढेको छ। क्षेत्रीय स्थायित्वमा गम्भीर असर पर्ने आशङ्का व्यक्त गर्दै विभिन्न मुलुकहरूले संयमता अपनाउन आह्वान गरेका छन्। यो सैन्य टकराव दीर्घकालीन द्वन्द्वमा रूपान्तरित हुन सक्ने जोखिम रहेको छ, जसले मध्यपूर्व मात्र होइन, विश्व राजनीतिमा समेत गहिरो प्रभाव पार्न सक्छ।