ट्रम्पले क्यानडा र मेक्सिकोमाथि २५% कर लगाउने प्रस्ताव एक महिनाका लागि स्थगित

काठमाडौँ ,२२ माघ । अमेरिकी राष्ट्रपति डोनाल्ड ट्रम्पले क्यानडा र मेक्सिकोमा २५ प्रतिशत कर लगाउने प्रस्तावलाई एक महिनाका लागि स्थगित गरेका छन् । मेक्सिको र क्यानडाले सीमा सुरक्षा सुधार गर्ने र लागूपदार्थको तस्करीलाई नियन्त्रणमा लिन विभिन्न कदमहरू चाल्ने सहमति जनाएपछि कर लगाउने प्रस्तावलाई एक महिना पछि धकेलिएको बीबीसीले जानकारी दिएको छ।

मेक्सिकोले अवैध औषधिको ओसारपसार रोक्नका लागि सीमामा दश हजार सैनिक पठाउने तयारी गरेको छ भने क्यानडाले लागूऔषधको समस्यामा सुधार ल्याउन एक जना वरिष्ठ सार्वजनिक अधिकारी नियुक्त गर्ने बताएको छ।

त्यसैगरी, मेक्सिकोका राष्ट्रपति क्लाउडिया शीनबामले दक्षिणमा हतियार ओसारपसारलाई सीमित गर्न अमेरिकासँग सहकार्यको प्रतिबद्धता जनाएको बताइएको छ।

यसअघि ट्रम्पले युरोपेली सङ्घमाथि पनि व्यापार शुल्क लगाउने चेतावनी दिएका थिए, तर बेलायतसँग सम्झौतामा काम गर्न सकिने सम्भावनाको संकेत दिएपछि उनले त्यो प्रस्तावबाट पछि हटेका थिए। राष्ट्रपती ट्रम्पका अनुसार, क्यानडा र मेक्सिकोसँगको भन्सार शुल्क वृद्धि फेन्टनिल औषधिको गैरकानुनी आपूर्तिलाई नियन्त्रण गर्नका लागि गरिएको कदम हो, जसले अमेरिकामा लाखौंको ज्यान लिएको छ।