गौशाला क्षेत्रमा भीड व्यवस्थापन : ट्राफिक प्रहरीले वैकल्पिक मार्ग तथा पार्किङ्ग स्थान तोक्यो

काठमाडौं – पशुपतिनाथ मन्दिर क्षेत्रमा भक्तजन र दर्शनार्थीहरूको सुविधाका लागि ट्राफिक प्रहरीले पार्किङ्ग तथा सवारी व्यवस्थापन मिलाएको छ। भक्तजनका सवारी साधनहरूका लागि तीलगंगा आँखा अस्पताल अगाडि, सिफलचौर, गुहेश्वरी पारी करिडोर सडक पार्किङस्थल तोकिएको छ भने बनकाली क्षेत्रमा दमकल, एम्बुलेन्स तथा खानेपानीका ट्याङ्करहरूका लागि पार्किङ्गको व्यवस्था गरिएको छ।

ट्राफिक प्रहरीले गौशाला क्षेत्र तथा चक्रपथमा दर्शनार्थीको अत्यधिक चापका कारण सवारी सञ्चालनमा समस्या आएमा वैकल्पिक मार्गको प्रयोग गरिने जनाएको छ। यस क्रममा करिडोर तथा भित्री सडकहरूमा थप ट्राफिक प्रहरी परिचालन गरिनेछ।

चाबहिल, गौशाला र तिलगंगा क्षेत्रमा सवारी सञ्चालनको व्यवस्था मिलाइएको भए पनि भिड अत्यधिक भएमा मात्र वैकल्पिक मार्गमार्फत सवारी सञ्चालन गरिनेछ। ट्राफिक प्रहरीका अनुसार तिनकुने, सिनामङ्गल, बौद्ध क्षेत्र, पुरानो बानेश्वर, गौशाला तथा मित्रपार्कतर्फ आउने मालबाहक सवारी साधनहरूलाई प्रवेश निषेध गरिएको छ।

त्यस्तै, वाग्मती करिडोर तथा जोरपाटीबाट चाबहिल हुँदै आउने सवारी साधनहरूका लागि गुहेश्वरी पारी पार्किङ्ग स्थान तोकिएको छ। गौशाला चोकमा भिड अत्यधिक भएमा चाबहिल, पुरानो बानेश्वर, ज्ञानेश्वर तथा सिफलचौरबाट आवतजावत गर्ने सवारी साधनलाई वैकल्पिक मार्ग प्रयोग गर्न लगाइनेछ।

सवारी चोरी नियन्त्रण गर्न सादा पोसाकमा प्रहरी परिचालन गरिने तथा ८०० ट्राफिक प्रहरी कमाण्ड सेन्टरमा तैनाथ गरिने ट्राफिक प्रहरी कार्यालयले जनाएको छ।