चितवनमा लोडसेडिङ होइन, मर्मत गर्न लागिएको हो: हितेन्द्रदेव शाक्य

काठमाडौं — नेपाल विद्युत् प्राधिकरणका कार्यकारी निर्देशक हितेन्द्रदेव शाक्यले चितवनमा लोडसेडिङ सुरु भएको भन्ने कुरा गलत भएको बताएका छन्।

आइतबार काठमाडौंमा सञ्चारकर्मीसँग कुरा गर्दै उनले चितवनमा रहेको सबस्टेशनको मर्मत र पुराना कन्डक्टर फेर्ने कामका कारण आइतबार र सोमबार केही समयका लागि बत्ती बन्द गर्नुपरेको जानकारी दिए।

शाक्यका अनुसार पुरानो कन्डक्टरले अहिलेको बढ्दो लोड थेग्न नसकेकाले नयाँ कन्डक्टर जडान गर्न लागिएको हो। यो नियमित सुधारको प्रक्रिया हो, तर लोडसेडिङ भनेर गलत बुझाइएको उनले स्पष्ट पारे।

उनले भने, “बिजुलीको क्षमता बढ्दा पुरानो नेटवर्कले थेग्न सकेन, त्यसैले सुधारको काम भइरहेको हो।” यस्तै, डेडिकेटेड र ट्रंक लाइनको बक्यौता उठाउने विषयमा गठित प्रशासकीय पुनरवलोकन समितिको म्याद ३५ दिन थपिएको शाक्यले जानकारी दिए।

यदि तोकिएको समयभित्र बक्यौता तिर्ने काम भएन भने लाइन काटिने उनले चेतावनी पनि दिए।