१९ कलिला बालकालिकाको मृत्यु पछि खुल्यो सामाजिक सञ्जाल

काठमाडौँ — सरकारले केही दिनअघि बन्द गरिएका सामाजिक सञ्जालहरू फेरि सञ्चालन गर्न अनुमति दिएको छ। अब ती सञ्जाललाई सञ्चालन गर्न आवश्यक प्रक्रिया पूरा गर्न सञ्चार तथा सूचना प्रविधि मन्त्रालयलाई जिम्मा दिइएको छ। मन्त्री पृथ्वी सुब्बा गुरुङका अनुसार, सरकारसँग पटक–पटकको आग्रहपछि पनि केही सामाजिक सञ्जालले नाम दर्ता नगरेपछि भदौ १९ गतेबाट २६ वटा सञ्जाल बन्द गरिएको थियो। अब तीमध्ये केही फेरि सञ्चालनमा आइसकेका छन्। नेपालमा दर्ता नभएका सामाजिक सञ्जाल बन्द गर्ने निर्णयबाट चार दिनपछि सरकार पछि हटेको छ । गत १९ भदौमा नियामक निकाय दूरसञ्चार प्राधिकरणलाई सञ्चार मन्त्रालयले निर्देशन दिँदै दर्ता नभएका सामाजिक सञ्चार तुरुन्त बन्न गर्न पत्राचार गरेको थियो ।

सोमबारको ‘जेन जि’ युवाहरूको प्रदर्शनमा भएको जनधनको क्षतिप्रति सरकार गहिरो दुःखी भएको बताउँदै मन्त्री गुरुङले घटनाको न्यायिक छानबिन गर्न समिति बनाइने जानकारी दिए। सरकारले प्रदर्शनका क्रममा ज्यान गुमाउनेहरूप्रति श्रद्धाञ्जली अर्पण गर्दै परिवारलाई राहत दिने र घाइतेहरूको उपचार निःशुल्क गरिने निर्णय गरेको छ। जेनजीको प्रदर्शनका क्रममा प्रहरीले चलाएको गोली लागेर घाइते भएका ४०० बढीको उपचार भइरहेको छ । जसमध्ये ट्रमा सेन्टरमा उपचार गराइरहेका ११ जनाको अवस्था गम्भीर रहेको छ ।

सरकारको भनाइमा, शान्तिपूर्ण प्रदर्शनमा केही अराजक समूहले घुसपैठ गरी सार्वजनिक र निजी सम्पत्तिमा तोडफोड गरेका छन्, जसको पहिचान गरी कारबाही गरिनेछ। सरकारले जेन जि युवाहरूलाई थप प्रदर्शन स्थगन गर्न र शान्ति सुरक्षामा सहयोग गर्न पनि अपिल गरेको छ। प्रदर्शनमा देखिएको समस्या समाधान गर्न सरकार गम्भीर रहेको जनाइएको छ।