वर्षाका कारण देशभर १३ स्थानमा सडक अवरुद्ध

काठमाडौं।  अविरल वर्षाका कारण देशभर १३ ठाउँमा सडक बन्द भएका छन्। पहिरो र बाढीले सडक अवरुद्ध बनाएको हो। प्रहरीका अनुसार संखुवासभाको भोटखोला र मकालु गाउँपालिकामा कोशी राजमार्गका भागहरू पहिरोले बन्द भएका छन्।

त्यस्तै, पासाङल्हामु राजमार्गअन्तर्गत गोसाइकुण्ड गाउँपालिकाको सडक, गल्छी–त्रिशूली–मैलुङ सडक, ढोरपाटन–सालझंडी, बेनी–दरबाङ, भेरी करिडोर, कर्णाली राजमार्गको जाजरकोट–छेडागाड र जाजरकोट–डोल्पा सडक पनि बन्द भएका छन्।

सडक खुलाउन सुरक्षाकर्मीहरू खटिएका छन्। देशका केही क्षेत्रमा अवरुद्ध सडकमध्ये ८ स्थानमा अहिले एकतर्फी सवारी सञ्चालन भइरहेको छ।