उपसभामुखमा कांग्रेसकी पुष्पा भुसालले उम्मेदवारी दर्ता,एमालेको साथ साना दललाई

काठमाडौँ, ३० असार । सत्तारुढ गठबन्धनको तर्फबाट उपसभामुखमा नेपाली कांग्रेसकी पुष्पा भुसालले उम्मेदवारी दर्ता गराएकी छिन् ।

केहि बेर अघि संसद सचिवालय पुगेर भुसालले उपसभामुख पदका लागि उम्मेदवारी दर्ता गराएकी हुन् । भुसालको उमेदवारीमा नेकपा माओवादी केन्द्रका देव गुरुङ प्रस्तावक बनेका छन् भने नेकपा (एकीकृत समाजवादी) का लक्ष्मीकुमारी चौधरी समर्थक रहेका छन्।प्रमुख विपक्षी नेकपा एमालेले प्रतिनिधिसभाको उपसभामुखमा साना दलले उम्मेदवार दिए उसैलाई सघाउने भएको छ ।  सुवास नेम्वाङका अनुसार लोकतान्त्रिक समाजवादी पार्टीकी चन्दा चौधरीले उपसभामुखमा उम्मेदवारी दिने भनेकाले एमालेले चौधरीलाई नै सघाउने सम्भावना रहेको नेम्वाङले बताए ।

आज बिहान ११ देखि १ बजेसम्म उम्मेदवारी मनोनयन गर्न पाइने संसद सचिवालयले जनाएको छ।

उपसभामुख पदको लागी आज उमेदवारी दर्ता र भोली शुक्रबार ३ बजे निर्वाचन हुदैछ ।

नेपालको संविधानको धारा ९० को उपधारा (२) उपधारा (१) बमोजिम निर्वाचन गर्दा प्रतिनिधिसभाको सभामुख र उपसभामुखमध्ये एक जना महिला हुनुपर्नै प्रावधान छ । प्रतिनिधिसभाको सभामुख र उपसभामुख फरक फरक दलको प्रतिनिधि हुनुपर्ने उल्लेख छ।

२०७६ साल माघ ६ गते तत्कालीन उपसभामुख डा. शिवमाया तुम्बाहाङ्फेले राजीनामा दिएपछि २९ महिनासम्म यो पद रिक्त थियो । तत्कालीन सत्तारूढ दल नेपाल कम्युनिस्ट पार्टी (नेकपा) ले सभामुखमा अग्निप्रसाद सापकोटालाई उम्मेदवार  बनाउने निर्णय गरेपछि तुम्बाहाङ्फेले राजीनामा दिनुभएको थियो ।