काठमाडौं, ११ भाद्र । कैलालीको धनगढीमा रहेको स्वस्तिक कार्डियो एण्ड मल्टिस्पेसियालिटी हस्पिटलमा पत्थरीको शल्यक्रिया गर्न आएका बिरामीको मृत्यु भएको छ । दुबै मृगौलामा पत्थरी भएर शल्यक्रिया गर्न आएका कञ्चनपुरको बेलौरी नगरपालिका वडा नम्बर १० शिवनगरका ५५ वर्षीय ऐजनलाल चौधरीको मृत्यु भएको हो । मृगौलाको शल्यक्रिया गरेर १४ एमएम र साढे नौ एमएमको पत्थरी निकालिएको भए पनि शल्यक्रियामा गरिएको त्रुटिले बिरामीको ज्यान गएको आफन्तले आरोप लगाएका छन् ।
मृतक चौधरीका भाइ नाता पर्ने विष्णुप्रसाद चौधरीका अनुसार ९ गते शनिबार बिहान ११ बजे बिरामीलाई अस्पताल भर्ना गरिएको थियो । अस्पतालमा डाक्टरले दुबै मृगौलामा पत्थरी रहेकाले शल्यक्रिया गर्न सुझाव दिएका थिए । डाक्टरको सुझाव बमोजिम सोही दिन दिउसो शल्यक्रियाका लागि बिरामीलाई शल्यक्रिया कक्षमा पठाइएको र एक घण्टापछि डाक्टरले शल्यक्रिया सफल भएको बताएका थिए । तर बिरामीले पेट दुखेको बताएपछि उनको स्वास्थ्यस्थितिबारे नर्सलाई नभन्दै बिरामी बेहोस भएको आफन्तले बताएका छन् ।
डाक्टरले पथ्यरी निकाल्दा भित्र नसा काटिएकाले आन्तरिक रक्तस्राव भएको र बिरामीलाई बचाउन दोस्रो शल्यक्रिया गरेर मृगौला झिक्नुपर्ने बताएपछि आफन्तले मञ्जुरी दिएको बताएका छन् ।
तर दोस्रो शल्यक्रिया गरेर मृगौला झिकेपछि बिरामी चौधरी होसमा नै नआएको भन्दै अस्पतालको लापरबाहीले उनको ज्यान गएको हो आफन्तको आरोप छ ।
श्रोतका अनुसार अस्पतालमा कार्यरत सर्जन डाक्टर जोनस तिवारको टोलीले चौधरीको शल्यक्रिया गरेका थिए । उनले बायाँ मृगौलाको पत्थरी झिक्ने क्रममा नसा काट्न पुग्दा अत्याधिक रक्तश्राव भएको र त्यसपछि मृगौला झिक्न अर्को शल्यक्रिया गर्दा बिरामीको मृत्यु भएको श्रोतले जनाएके छ । दोस्रो शल्यक्रिया पश्चात् बिरामीको अवस्था थप नाजुक भएपछि डाक्टरले अब सकिँदैन भनेर भनेको आफन्तले बताएका छन् ।
उनीहरुले शल्यक्रिया सफल भयो भनेर डाक्टरहरुले झुट बोलेको र अस्ततालको लापरबाहीले चौधरीको ज्यान गएकाले अर्काको ज्यानमाथि खेलवाड गर्नेलाई कारबाही हुनुपर्ने भन्दै विरोध गरिरहेका छन् ।
आफन्त लगायतले विरोध गर्न थालेपछि अस्पतालमा सुरक्षा बढाइएको जिल्ला प्रहरी कार्यालय कैलालीले जनाएको छ । मृतकका आफन्तजनले डाक्टरको लापरबाहीले बिरामीको मृत्यु भएकाले सत्य तथ्य छानबिनको माग गर्दै जिल्ला प्रहरी कार्यालय कैलालीमा अस्पताल र डाक्टर विरुद्ध उजुरीको तयारी गरेका जनाइएको छ ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
